ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ អនុញ្ញាតអោយ លោកស្រី Lourdes N. Pagaran មន្រ្តីវាយតម្លៃជាន់ខ្ពស់ សម្រាប់កម្មវិធីគ្រប់គ្រងសេដ្ឋកិច្ចនិងប្រទេស នៃក្រុមវាយតម្លៃឯករាជ្យ របស់ធនាគារពិភពលោក ចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ១៤ កុម្ភៈ ២០១៨ 2496

កាលពីវេលាម៉ោង ៣រសៀល ថ្ងៃទី ២៤ ខែតុលា ឆ្នាំ២០១៦ នៅទិស្តីការក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតអោយ លោកស្រី Lourdes N. Pagaran មន្រ្តីវាយតម្លៃជាន់ខ្ពស់ សម្រាប់កម្មវិធីគ្រប់គ្រងសេដ្ឋកិច្ចនិងប្រទេស នៃក្រុមវាយតម្លៃឯករាជ្យ របស់ធនាគារពិភពលោក ចូលជួបសម្តែងការគួរសម និងពិភាក្សាការងារពាក់ព័ន្ធទៅនឹងស្ថានភាពសេដ្ឋកិច្ចប្រជាជននៅតាមជនបទ ជាពិសេសកសិករដែលមានចំណូលទាប។ ធនាគារពិភពលោក បានចាត់បញ្ជូនក្រុមវាយតម្លៃឯករាជ្យ មកពិភាក្សាការងារជាមួយស្ថាប័នពាក់ព័ន្ធរាជរដ្ឋាភិបាលកម្ពុជា ចាប់ពីថ្ងៃទី២៤ ខែតុលា ឆ្នាំ២០១៦ ដល់ថ្ងៃទី០៤ ខែវិច្ជិកា ឆ្នាំ២០១៦ នៅទីក្រុងភ្នំពេញ ដើម្បីវាយតម្លៃការគាំទ្រក្រុមធនាគារពិភពលោក សម្រាប់វិបុលភាពនៃការចែករំលែក ដោយផ្តោតសំខាន់លើ ១. វិស័យកសិកម្ម/ជនបទ អប់រំ សុខាភិបាល ការការពារសង្គម និងថាមពល ២. គោលនយោបាយ រួមមានគោលនយោបាយសារពើពន្ធ និងអន្តរាគមន៏ទីផ្សារពលកម្ម និង ៣. ការងារចម្រុះវិស័យ (យេនឌ័រ)។

ឯកឧត្តមរដ្ឋមន្រ្តី បានមានប្រសាសថា តាមរយៈការវាយតម្លៃរបស់ធនាគារពិភពលោក កន្លងមកបានបង្ហាញថា គិតចាប់ពីឆ្នាំ១៩៩៣​ មកដល់បច្ចុប្បន្ន អត្រានៃភាពក្រីក្រនៅកម្ពុជា បានធ្លាក់ចុះពី​ ៤០ភាគរយ មកត្រឹម ១៣ភាគរយ នៃប្រជាជនសរុប ដែលបង្ហាញពីផលវិជ្ជមាននៃការអភិវឌ្ឍន៏សេដ្ឋកិច្ចរបស់កម្ពុជា។ ដោយឡែក កម្ពុជាក៏នៅជួបបញ្ហាប្រឈមមួយចំនួន ពាក់ព័ន្ធការធ្លាក់ចុះនៃកំលាំងពលកម្មនៅក្នុងវិស័យកសិកម្ម និងអត្រានៃចំណូលរបស់ប្រជាកសិករខ្នាតតូចមួយចំនួន នៅមិនទាន់អាចឆ្លើយតបទៅនឹងកំណើនសេដ្ឋកិច្ចនៅឡើយ។ ឯកឧត្តមរដ្ឋមន្រ្តី បានស្នើអោយធនាគារ ពិភពលោក ជួយគាំទ្រដល់ការវិភាគនៅស្ថានភាពសេដ្ឋកិច្ចកសិកម្ម ដើម្បីស្វែងរកនូវលទ្ធភាពជួយគាំទ្រដល់កសិករខ្នាតតូច និងមធ្យម ក្នុងទិសដៅជំរុញអោយជីវភាពពួកគាត់មានភាពប្រសើរឡើង ហើយអាចឆ្លើយតបទៅនឹងការវិវឌ្ឍន៏នៃសេដ្ឋកិច្ចជាតិ។ ឯកឧត្តមរដ្ឋមន្រ្តី បានបញ្ជាក់ថា ការលើក កម្ពស់កម្រិតជីវភាពកសិករខ្នាតតូច និងមធ្យម ជាមូលដ្ឋានសំខាន់ក្នុងការជំរុញកំណើនវិស័យកសិកម្មនៅកម្ពុជា និងកាត់បន្ថយបានខ្លាំងនូវអត្រានៃអ្នកចំណាកស្រុក។ ឆ្លើយតបទៅនឹងសំណូមពររបស់ ឯកឧត្តមរដ្ឋមន្រ្តី លោកស្រី Lourdes N. Pagaran បានបញ្ជាក់ថា តំណាងធនាគារ ពិភពលោកមានគំរោង នឹងចុះមកធ្វើការពិគ្រោះយោបល់ជាមួយក្រសួងកសិកម្ម រុក្ខាប្រមាញ់ និងនេសាទ នៅក្នុងអំឡុងខែវិច្ជិកា ខាងមុខ ដើម្បីពិនិត្យ និងពិភាក្សាពីបញ្ហាប្រឈមពាក់ព័ន្ធនឹងការលើកកម្ពស់ជីវភាពប្រជាពលរដ្ឋតាមជនបទ ជាពិសេស​កសិករ សំដៅកាត់បន្ថយអត្រានៃភាពក្រីក្រនៅកម្ពុជាអោយនៅកម្រិតអប្បបរមា។