ព័ត៌មានផ្សេងៗទៀត
ឯកឧត្តមរដ្ឋមន្ត្រី ឌិត ទីណា ចូលរួមពិធីប្រគល់សម្ភារ បរិក្ខារ និងកញ្ចប់ថវិកាវិនិយោគនៃកម្មវិធីគាំទ្រសហគ្រាសជលផលខ្នាតតូច និងមធ្យម (VCIS)
ចេញផ្សាយ ២៩ មេសា ២០២៣ 2263
នៅរសៀលថ្ងៃទី២៨ ខែមេសា ឆ្នាំ២០២៣ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានចូលរួមពិធីប្រគល់សម្ភារ បរិក្ខារ និងកញ្ចប់ថវិកាវិនិយោគនៃកម្មវិធីគាំទ្រសហគ្រាសជលផលខ្នាតតូច និងមធ្យម (VCIS) ក្រោមក្របខណ្ឌគម្រោង CAPFISH-CAPTURE ដែលអនុវត្តដោយរដ្ឋបាលជលផល និង អង្គការ UNIDO នៅសណ្ឋាគារឡឺរ៉ូយ៉ាល់។
ក្នុងពិធីនេះ ឯកឧត្តមរដ្ឋមន្ត្រី បានរំឭកដល់សហគ្រាសដែលទទួលបានសម្ភារ បរិក្ខារ និងកញ្ចប់ថវិកាវិនិយោគនេះ ត្រូវបន្តសហការល្អជាមួយគម្រោងនិងអនុវត្តតាមផែនការអាជីវកម្មឱ្យបានល្អ ឱ្យមានចីរភាព និងនិរន្តរភាព ហើយសម្រាប់សហគ្រាសដែលមិនទាន់ទទួលបានពេលនេះ ត្រូវធ្វើនវានុវត្តន៍អាជីវកម្មរបស់ខ្លួនបន្ថែមទៀត ដោយផ្តោតលើគុណភាព និងសុវត្ថិភាពអនាម័យ ហើយក្រសួងនៅរង់ចាំជួយសហការសម្របសម្រួលសម្រាប់ទាំងអស់គ្នា ពិសេសការផ្សព្វផ្សាយ ដើម្បីជំរុញចូលទីផ្សារទាំងក្នុងស្រុក និងឈានទៅអន្តរជាតិ។
បើតាម ឯកឧត្តមរដ្ឋមន្ត្រី ការផលិតត្រូវយកចិត្តទុកដាក់ជាចាំបាច់លើគុណភាព និងសុវត្ថិភាពអនាម័យតាមស្តង់ដា និងគោលនយោបាយ ដោយមិនប្រកួតលើបរិមាណ ដែលនាំតម្លៃធ្លាក់ចុះនោះឡើយ តែរក្សាបាននូវខ្សែច្រវាក់តម្លៃល្អ បង្កើនចំណូល មានផលចំណេញដល់ប្រជាកសិករ មានប្រសិទ្ធភាពសេដ្ឋកិច្ច និងនិរន្តរភាពពិតប្រាកដ។
សូមជម្រាបជូនថា នៅក្នុងពិធីនេះ គម្រោងបានប្រគល់សម្ភារ បរិក្ខារ ដល់តំណាងសហគ្រាសជុំទី១ ចំនួន ៣សហគ្រាស និងប្រគល់កញ្ចប់ថវិកាវិនិយោគដល់សហគ្រាសជុំទី២ ចំនួន ១១សហគ្រាស៕
