វគ្គបណ្ដុះបណ្ដាលស្ដីពី ការកំណត់អត្តសញ្ញាណគម្រោងក្នុងតំបន់ (Training on Regional Project Identification)

ចេញ​ផ្សាយ​ ២១ សីហា ២០២៣ 5109

ខេត្តកនកេន៖ ដោយទទួលបានការអញ្ជើញពីវិទ្យាស្ថានមេគង្គ នៃព្រះរាជាណាចក្រថៃឡង់ដ៍ លោក ផុន រិណុ ប្រធានការិយាល័យគ្រប់គ្រងការកែច្នៃ នៃនាយកដ្ឋានកសិ-ឧស្សាហកម្ម ក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមវគ្គបណ្ដុះបណ្ដាលស្ដីពីការកំណត់អត្តសញ្ញាណគម្រោងក្នុងតំបន់ (Training on Regional Project Identification) រយៈពេល ០៥ថ្ងៃ គឺចាប់ពីថ្ងៃចន្ទ ១៣រោច ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៤ ខែសីហា ឆ្នាំ២០២៣ រហូតដល់ថ្ងៃសុក្រ ២កើត ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែសីហា ឆ្នាំ២០២៣ វគ្គបណ្ដុះបណ្ដាលនេះ ប្រព្រឹត្តទៅនៅវិទ្យាស្ថានមេគង្គ ខេត្តកនកេន ព្រះរាជាណាចក្រថៃឡង់ដ៍ និងដោយមានការអញ្ជើញចូលរួមពីមន្ដ្រីជំនាញតំណាងក្រសួង-ស្ថាប័នពាក់ព័ន្ធដូចជា ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ ក្រសួងសាធារណការ និងដឹកជញ្ជូន ក្រសួងប្រៃសណីយ៍និងទូរគមនាគមន៍ និងក្រសួងបរិស្ថាន សរុបចំនួន ០៨រូប ពីប្រទេសកម្ពុជា ។ គោលបំណងសំខាន់នៃវគ្គបណ្ដុះបណ្ដាលនេះ គឺធ្វើយ៉ាងណាជំរុញឱ្យបណ្ដាប្រទេសក្នុងតំបន់មេគង្គ-កូរ៉េ រួមគ្នាដោះស្រាយបញ្ហាក្នុងតំបន់តាមរយៈកិច្ចសហការគ្នារវាងស្ថាប័នជំនាញដើម្បីរៀបចំការបង្ហាញចំណាប់អារម្មណ៍ (EOI) លើអាទិភាពលើវិស័យចំនួន០៧ រូមមាន៖ វប្បធម៌ និងទេសចរណ៍(Culture and Tourism), ការអភិវឌ្ឍធនធានមនុស្ស (Human Resources Development), កសិកម្មនិងការអភិវឌ្ឍជនបទ (Agriculture and Rural Development), ហេដ្ឋារចនាសម្ព័ន្ធ (Infrastructure),
បច្ចេកវិទ្យាព័ត៌មាន និងទូរគមនាគមន៍ (Information and Communication Technology) បរិស្ថាន (Environment) និងបញ្ហាប្រឈមសន្ដិសុខមិនមែនប្រពៃណី (Non-traditional Security Challenges)។ ដោយសិក្ខាកាមចូលរួមវគ្គបណ្ដុះបណ្ដាលនេះមានចំនួនសរុប ៣០រូប (ស្រី ១៩រូប) មកពីប្រទេសក្នុងតំបន់មេគង្គចំនួន ០៥ រួមមានប្រទេសកម្ពុជា ថៃ ឡាវ ភូមា និងវៀតណាម ក្រោមជំនួយឧបត្ថម្ភពីរដ្ឋាភិបាលនៃសាធារណរដ្ឋកូរ៉េ តាមរយៈមូលនិធិសហប្រតិបិតិ្តការមេគង្គ-កូរ៉េ (MKCF) ។ ដោយឡែកនាយកដ្ឋានកសិ-ឧស្សាហកម្ម នឹងរៀបចំ និងចែករំលែក EOI រួមគ្នាជាមួយបណ្ដាប្រទេសក្នុងតំបន់មេគង្គនាឆ្នាំ២០២៤ ខាងមុខនេះ។