ពិធីបិទវគ្គបណ្តុះបណ្តាលស្តីពីការគ្រប់គ្រងទ្រព្យសម្បត្តិរដ្ឋ ក្រោមអធិបតីភាពឯកឧត្តមរដ្ឋមន្រ្តី វេង សាខុន

ចេញ​ផ្សាយ​ ២៩ វិច្ឆិកា ២០១៨ 3930

នាព្រឹកថ្ងៃព្រហស្បតិ៍ ៧រោច ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៨ នៅទីស្តីការក្រសួងកសិកម្ម រុក្ខាប្រមាញ់ និងនេសាទបានរៀបចំពិធីបិទវគ្គបណ្តុះបណ្តាលស្តីពីការគ្រប់គ្រងទ្រព្យសម្បត្តិរដ្ឋ ក្រោមអធិបតីភាពឯកឧត្តមរដ្ឋមន្រ្តី វេង សាខុន អមដោយឯកឧត្ដម លោកជំទាវ ថ្នាក់ដឹកនាំ លោក លោកស្រី នាងកញ្ញា សមាជិក សមាជិកា ដែលជាមន្រ្តិរាជការក្រោមឱវាទ ព្រមជាមួយសិក្ខាកាម។ វគ្គបណ្តុះបណ្តាលនេះមានរយៈពេល ០៣ថ្ងៃ ដែលត្រូវបានសហការរៀបចំឡើងដោយអគ្គាធិការនៃអគ្គាធិការដ្ឋានក្រសួងកសិកម្ម រុក្ខាប្រមាញ់ និងនេសាទ អគ្គាធិការនៃអគ្គាធិការដ្ឋាននៃក្រសួងសេដ្ឋកិច្ច និងហិរញ្ញវត្ថុ រួមជាមួយនាយកដ្ឋានពាក់ព័ន្ធ ក្នុងគោលបំណង៖ ១- ផ្តល់ឱកាសឲ្យមន្រ្តីជំនាញស្វែងយល់ ដកស្រង់យកបទពិសោធន៍ពីគ្នាទៅវិញទៅមក វិភាគអំពីចំណុចខ្លាំងចំណុចខ្សោយ បញ្ហាប្រឈមនៅក្នុងការអនុវត្តកម្មវិធីកែទម្រង់ប្រព័ន្ធត្រួតពិនិត្យ និងប្រព័ន្ធគ្រប់គ្រងទ្រព្យសម្បត្តិរដ្ឋ សម្រាប់ជាធាតុចូលក្នុងការពង្រឹងការងារអនុវត្ត និងកែលម្អនីតិវិធីធ្វើអធិការកិច្ចឲ្យបានល្អប្រសើរសម្រាប់វិស័យកសិកម្ម។ ២- ចូលរួមចំណែកអនុវត្តគោលនយោបាយ ផែនការយុទ្ធសាស្រ្តនៃការកសាងធនធានមនុស្សប្រកបដោយប្រសិទ្ធភាពរបស់រាជរដ្ឋាភិបាល ក្នុងការពង្រឹងអភិបាលកិច្ចល្អ និងប្រយុទ្ធប្រឆាំងនឹងអំពើពុករលួយ ភាពអសកម្ម និងគោរពនីតិរដ្ឋក្នុងក្របខ័ណ្ឌកំណែទម្រង់ស៊ីជម្រៅរបស់រាជរដ្ឋាភិបាល។

ឯកឧត្តមរដ្ឋមន្រ្តីបានបញ្ជាក់ជូនអង្គពិធីជ្រាបថាប្រធានបទស្តីពីការគ្រប់គ្រងទ្រព្យសម្បត្តិរដ្ឋ គឺមានសារៈសំខាន់ក្នុងន័យឲ្យអង្គភាពនីមួយៗត្រូវចេះទទួលខុសត្រូវលើការបាត់បង់ទ្រព្យសម្បត្តិរដ្ឋ និងត្រូវចូលរួមយកចិត្តទុកដាក់មើលថែរក្សាទ្រព្យសម្បត្តិរដ្ឋឲ្យបានគង់វង្សល្អ។ ដូច្នេះ អង្គភាពត្រូវអនុវត្តគោលការណ៍ យន្តការ ឬនីតិវិធីដើម្បីធ្វើការគ្រប់គ្រង ប្រើប្រាស់ និងថែរក្សាឲ្យបានល្អ ហើយនេះជាភារកិច្ចដ៏ចាំបាច់ដែលប្រធានអង្គភាពនីមួយៗត្រូវចងចាំ ដោយអនុលោមតាមស្មារតីនៃអនុក្រឹត្យលេខ១២៩ អនក្រ.បក ចុះថ្ងៃទី២៧ ខែវិច្ឆិកា ឆ្នាំ២០០៦ ស្តីពីវិធាននិងនីតិវិធីនៃការធ្វើអនុបយោគទ្រព្យសម្បត្តិសាធារណៈរបស់រដ្ឋ និងរបស់នីតិបុគ្គលសាធារណៈដែលក្នុងនោះមានជាអាទិ៍៖ ១- ការរៀបចំបញ្ជីសារពើភ័ណ្ឌទ្រព្យសម្បត្តិរបស់រដ្ឋ ២-ការជួលទ្រព្យសម្បត្តិរបស់រដ្ឋ ៣- ការលក់ទ្រព្យសម្បត្តិរបស់រដ្ឋ និង៤- ការដូរទ្រព្យសម្បត្តិឯកជនរបស់រដ្ឋ។ ក្រៅពីនេះ ក៏ត្រូវយកចិត្តទុកដាក់អនុវត្តនូវរាល់ខ្លឹមសារសំខាន់ៗដែលមាននៅក្នុងអនុក្រឹត្យលេខ៦៦អនក្រ.បក ចុះថ្ងៃទី២៧ ខែមេសា ឆ្នាំ២០១៧ ស្តីពីវិធាន និងនីតិវិធីនៃការគ្រប់គ្រងបញ្ជីសារពើភ័ណ្ឌទ្រព្យសម្បត្តិរដ្ឋ - សារាចរណែនាំលេខ០០១ សហវ.ទរ ចុះថ្ងៃទី២០ ខែមករា ឆ្នាំ២០០៥ ស្តីពីការកែសម្រួលធ្វើបញ្ជីសារពើភ័ណ្ឌទ្រព្យសម្បត្តិរដ្ឋ - សារាចររបស់រាជរដ្ឋាភិបាលលេខ០៧ សរ ចុះថ្ងៃទី៣០ ខែមិថុនា ឆ្នាំ២០១៤ ស្តីពីការរៀបចំបញ្ជីសារពើភ័ណ្ឌទ្រព្យសម្បត្តិរដ្ឋ។

ឆ្លៀយយកឱកាសដ៏មានតម្លៃនេះ ឯកឧត្តមរដ្ឋមន្រ្តីបានធ្វើការណែនាំដល់ឯកឧត្តម លោក លោកស្រីប្រធានគ្រប់អង្គភាពឲ្យយកចិត្តទុកដាក់ក្នុងភាពទទួលខុសត្រូវខ្ពស់អនុវត្តនូវចំណុចគន្លឹះមួយចំនួនដូចខាងក្រោម៖ ទី១- ត្រូវណែនាំ និងជំរុញការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋតាមនីតិវិធី លិខិតបទដ្ឋានគតិយុត្តពាក់ព័ន្ធក្នុងស្មារតីទទួលខុសត្រូវ។ ត្រូវត្រួតពិនិត្យ និងវាយតម្លៃពីភាពត្រឹមត្រូវនៃការរៀបចំ និងកត់ត្រាបញ្ជីសារពើភណ្ឌទ្រព្យសម្បត្តិរដ្ឋប្រចាំឆ្នាំ ព្រមទាំងជម្រះចេញពីបញ្ជីសារពើភណ្ឌទ្រព្យសម្បត្តិរដ្ឋនូវទ្រព្យសម្បត្តិចាស់ទ្រុឌទ្រោមប្រើប្រាស់លែងកើត ដោយអនុលោមតាមបទប្បញ្ញត្តិគតិយុត្តជាធរមាន ហើយត្រូវជំរុញការធ្វើវិញ្ញាបនបត្រសម្គាស់ម្ចាស់អចលនវត្ថុឬ ប័ណ្ណសម្គាស់សិទ្ធិកាន់កាប់អចលនវត្ថុរបស់រដ្ឋ ដែលស្ថិតក្រោមការគ្រប់គ្រងរបស់អង្គភាពនីមួយៗ។ ទី២- ត្រូវធ្វើសវនកម្មលើការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋឲ្យមានប្រសិទ្ធភាព តម្លាភាព និងគណនេយ្យភាព។ ទី៣- រៀបចំសៀវភៅបញ្ជីសារពើភណ្ឌឆ្នាំគោល កត់ត្រាលម្អិតនូវទ្រព្យសម្បត្តិរដ្ឋទាំងអស់ជាចលនទ្រព្យ និងអចលនទ្រព្យស្ថិតក្រោមការគ្រប់គ្រងរបស់អង្គភាព ដែលត្រូវធ្វើឡើងក្នុងរយៈពេល៥ឆ្នាំម្តង ហៅថា ឆ្នាំគោល។ ទី៤- អង្គភាពត្រូវបំពេញបែបបទចុះបញ្ជីអចលនទ្រព្យ និងស្នើសុំវិញ្ញាបនបត្រសម្គាល់ម្ចាស់អចលនវត្ថុ ឬប័ណ្ណសម្គាល់សិទ្ធិកាន់កាប់អចលនវត្ថុ និងអចលនទ្រព្យទាំងអស់មកក្រសួងដើម្បីស្នើទៅក្រសួង រៀបចំដែនដី នគរូបនីយកម្ម និងសំណង់ ហើយត្រូវរៀបចំធ្វើតារាងបច្ចុប្បន្នភាពបញ្ជីជួលទ្រព្យសម្បត្តិរដ្ឋ សម្បទានដីសេដ្ឋកិច្ច សម្បទានដីសង្គមកិច្ច និងសម្បទានទ្រព្យសម្បត្តិរដ្ឋដទៃទៀត។ ទី៥- រាល់ពេលគម្រោងនីមួយៗត្រូវបានបញ្ចប់ ស្នើឯកឧត្តម លោក លោកស្រីប្រធានគ្រប់អង្គភាពគ្រប់គ្រងគម្រោងទាំងអស់ សហការជាមួយអង្គភាពរដ្ឋ រៀបចំបែបបទប្រគល់-ទទួលទ្រព្យសម្បត្តិទាំងនោះ ហើយកត់ត្រាចូលក្នុងបញ្ជីសារពើភ័ណ្ឌទ្រព្យសម្បត្តិរដ្ឋ និងផ្តល់ឯកសារពាក់ព័ន្ធទាំងអស់ជូនមកគណៈកម្មការសារពើភ័ណ្ឌក្រសួងដើម្បីតាមដាន វាយតម្លៃ និងគ្រប់គ្រងបន្ត។ ទី៦- បន្តអនុវត្តសេចក្តីជូនដំណឹងលេខ៩៣៣៩ កសក ចុះថ្ងៃទី២៦ ខែតុលា ឆ្នាំ២០១៧ ស្តីពីការគ្រប់គ្រងវត្តមានមន្ត្រីរាជការស៊ីវិល និងមន្ត្រីជាប់កិច្ចសន្យា ឲ្យកាន់តែមានប្រសិទ្ធភាពបន្ថែមទៀត។ ទី៧-នាយកដ្ឋានគណនេយ្យ ហិរញ្ញវត្ថុ ត្រូវធ្វើការតាមដាននូវការធ្វើបញ្ជីសារពើភ័ណ្ឌ និងតារាងប្រៀបធៀបទ្រព្យសម្បត្តិរដ្ឋកើនឡើង ថយចុះ ជាប្រចាំឆ្នាំឲ្យកាន់តែមានប្រសិទ្ធភាព។ ប្រធានអង្គភាព និងមន្ទីររាជធានី ខេត្តទាំងអស់ត្រូវជំរុញដល់មន្រ្តីបង្គោលប្រព័ន្ធព័ត៌មានវិទ្យាឲ្យបញ្ចូលទិន្នន័យត្រឹមត្រូវ និងទាន់ពេលវេលា យកចិត្តទុកដាក់ និងទទួលខុសត្រូវខ្ពស់លើការគ្រប់គ្រងទ្រព្យសម្បត្តិរបស់រដ្ឋ។