Other News
ក្រសួងកសិកម្មតាំងពិព័រណ៍ឯកសារសម្ភារៈផ្សព្វផ្សាយកសិកម្ម
ចេញផ្សាយ ២២ មករា ២០១៨ 3056
ក្រសួងកសិកម្ម រុកា្ខប្រមាញ់ និងនេសាទ បានបើកពិធីតាំងពិព័រណ៍ឯកសារសម្ភារៈ ផ្សព្វផ្សាយកសិកម្ម ដែលបានចូលរួមដាក់បង្ហាញ នូវផលិតផលកសិកម្ម របស់មន្ទើរកសិកម្ម ជុំវិញបឹងទន្លេសាប ចំនួន៤អង្គការក្រៅរាជរដ្ឋាភិបាល និងក្រុមហ៊ុនស្តង់ដា របស់ក្រុមហ៊ុនឯកជន ចំនួន៧០ស្តង់ នៅទីស្តីការក្រសួង កាលពីព្រឹកថ្ងៃទី២៣ ខែកុម្ភៈ។ ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុកា្ខប្រមាញ់និងនេសាទ បានអញ្ជើញចូលរួមក្នុងពិធីនេះដោយផ្ទាល់។ កម្មវិធីនេះសហការរៀបចំ ដោយក្រសូងកសិកម្ម និងគម្រោងបង្ហាញបច្ចេកវិជ្ជា ដើម្បីបង្កើនផលិតភាពកសិកម្មជុំវិញតំបន់បឹងទន្លេសាប។
ឯកឧត្តម សូ ខនឬទ្ធីប្រតិភូរាជរដ្ឋាភិបាល ទទួលបន្ទុកអគ្គនាយកនៃអគ្គនាយកដា្ឋនកសិកម្ម បានថ្លែក្នុងពិធីនេះថា ដើម្បីបង្កើនផលិតផលកសិកម្ម នៅជុំវិញបឹងទន្លេសាប ជាគម្រោងជំនួយបច្ចេកទេស ដែលផ្តល់ហិរញ្ញប្បទានរួមគា្ន ដោយរាជរដ្ឋាភិបាលហាំ្វងឡង់ មូលនិធិចែករំលែកពុទ្ធនៃសាធារណៈកូរ៉េ និងធនាគារអភិវឌ្ឍន៍អាស៊ី ដែលគំម្រោងបណងកែលម្អ និងបង្កើនប្រភពចំនូល ដល់គ្រួសារកសិករក្រីក្រនៅជុំវិញបឹងទន្លេសាប តាមរយៈការផ្តល់លទ្ធភាព ប្រើប្រាស់បច្ចេកវិជ្ជា និងប្រើប្រាស់នូវការអនុវត្តន៍វិធីសាស្ត្រ បច្ចេកទេសកសិកម្ម និងព័ត៌មានល្អៗដល់កសិករនៅជនបទ។
គម្រោងនេះមានថវិការសរុបចំនួន៣.៦៥០.០០០ដុលា្លរអាមេរិក និងមានរយៈពេលអនុវត្តចំនួនបីឆ្នាំ ដែលមានខេត្តគោលដៅអនុវត្តចំនួន៤គឺខេត្តកំពង់ចាម កំពង់ធំ សៀមរាប និងខេត្តបន្ទាយមានជ័យ។ ឯកឧត្តមបន្តថាគម្រោងនេះមានសមាសភាគពីរ។
ទី១បង្ហាញ និងបណ្តុះបណ្តាលបច្ចេកទេសកសិកម្ម និងទីពីរសាកល្បងផ្តល់សេវាកម្មព័ត៌មានជនបទ តាមរយៈការបង្កើនតេលេសិនធ័រ។ក្រសួងកសិកម្ម រុកា្ខប្រមាញ់ និងនេសាទ ជាភា្នក់ងារប្រតិបត្តិគម្រោង រីឯអាជា្ញធរជាតិ NIDA ជាភា្នក់ងារអនុវត្តគម្រោងសមាសភាគទី២។
ឯកឧត្តមរដ្ឋមន្ត្រីក្រសួងកសិកម្ម បានថ្លែងទៅកាន់អ្នកចូលរួមជាច្រើនរយនាក់គម្រោងនេះអនុវត្តដោយក្រសួងកសិកម្ម សហការជាមួយអាជ្ញាធរជាតិ ទទួលបន្ទុកកិច្ចការអភិវឌ្ឍន៍វិស័យបច្ចេកវិជ្ជាគមនាគមន៍ ពត៌មានវិទ្យាហើយថ្ងៃនេះគម្រោង ធ្វើការសាកល្បង លើការបង្ហាញ និងបណ្តុះបណ្តាលបច្ចេកវិជា្ជកសិកម្ម ក៏ដូចជាការផ្តល់នូវសេវាព័ត៌មានកសិកម្មជនបទ ក្នុងគោលដៅពង្រីកចំនូលគ្រួសារកសិករ ខ្នាតតូចនៅក្នុងគោលដៅខេត្តទាំង៤ដ៏មានសកា្តនុពល នៅតំបន់ជុំវិញបឹងទន្លេសាប ដែលមានប្រជាជនរស់នៅយ៉ាងច្រើនកុះករ ប្រកបរបរកសិកម្មចម្រុះ គួរឲ្យកត់សម្គាល់បើប្រៀបធៀបទៅនឹងខេត្តដទៃទៀត។
ឯកឧត្តមបន្តទៀតថា រយៈពេលជិត១ទសវត្សរ៍ចុងក្រោយនេះ ប្រមុខរាជរដ្ឋាភិបាល បានផ្តល់អាទិភាព នៅក្នុងការអនុវត្តន៍គោលនយោបាយ ជំរុញកំណើន ដើម្បីកាត់បន្ថយភាពក្រីក្រ និងការអភិវឌ្ឍន៍ ពោលគឺលើកស្ទួយវិស័យកសិកម្ម។ ឯកឧត្តមបន្តថា ការគិតគូររបស់យើង គឺសាមញ្ញ និងងាយយល់ណាស់។ ជាប្រពៃណីប្រទេសកសិកម្ម ដែលវិស័យនេះ បានរួមចំណែកយ៉ាងធំក្នុងវិស័យសេដ្ឋកិច្ច ជាតិប្រមាណ ជា១ភាគបីនៃសេដ្ឋកិច្ចបច្ចុប្បន្ន។
ឯកឧត្តមរដ្ឋមន្ត្រី បានបញ្ជក់ថានៅឆ្នាំនេះ រាជរដា្ឋភិបាលកម្ពុជា បានដាក់ចេញផែនការ ជំរុញផលិតកម្មស្រូវបន្ថែមទៀត និងគម្រោងនាំចេញអង្ករឲ្យបានយ៉ាងតិច ចំនួន១លានតោន ត្រឹមឆ្នាំ២០១៥ ដើម្បីជួយរួមចំណែករុញច្រានកំណើនសេដ្ឋកិច្ច របស់ប្រទេស ឲ្យបានចន្លោះ ពី៦ភាគរយ ទៅ៧ភាគរយ ក្នុងរយៈពេល៣ឆ្នាំខាងមុខ ចាប់ពីឆ្នាំ២០១១ទៅ។ ដោយសារសក្តានុពលដ៏ទូលាយនៃវិស័យនេះអ្នកវិនិយោគទុនបរទេស នឹងចូលមកបណ្តាក់ទុនកាន់តែច្រើនថែមទៀត ជាពិសេសគឺផ្នែករោងម៉ាស៊ីនកិនស្រូវធំៗជាដើម។
ដូច្នេះវិស័យកសិកម្មនេះ ក៏នឹងដើរតួនាទីជាមូលដ្ឋានគ្រឺះ សម្រាប់កំណើនវិស័យផ្សេងៗទៀត នៅឆ្នាំក្រោយផងដែរ។ ក្រៅពីវិស័យកសិកម្ម ក៏ផ្តល់មូលដ្ឋានច្រើន សម្រាប់ឧស្សាហកម្មកែច្នៃម្ហូបអាហារ និងចំណីសត្វ ហើយយើងឃើញថា នៅក្នុងឆ្នាំ២០១០ មានដំណើរការវិវត្តន៍ល្អ ដែលជាមូលដ្ឋានដល់ឆ្នាំ២០១១។
ឯកឧត្តមបន្តទៀតថា ជារួមពលរដ្ឋខ្មែរយើង ពឹងផ្អែកលើរបរកសិកម្ម សម្រាប់ទ្រទ្រង់ជីវភាព រស់នៅរបស់ពួកគេ ប៉ុន្តែពួកគេ ភាគច្រើន ធ្វើស្រែជាលក្ខណៈគ្រួសារ តាមបែបប្រពៃណី ដោយពឹងផ្អែកទាំងស្រុង ទៅលើទឹកភ្លៀង ដោយសារតែកង្វះប្រព័ន្ធទឹកស្រោចស្រពស្រែ ចំការរបស់ពួកគេ។
ចំណែកឯវិធីសាស្រ្តក្នុងការដាំដុះផលដំណាំទៀតសោត ក៏ពុំទាន់ស្របតាមស្តាង់ដារបច្ចេកទេសទំនើបដែលអាចបង្កើនគុណភាព និងទិន្នផលអោយបានច្រើននៅឡើយ។ ដូច្នេះវិស័យកសិកម្មជាតួអង្គមួយសំខាន់បំផុតសម្រាប់គ្រាប់កាលៈទេសៈ និងសម្រាប់កំណើនសេដ្ឋកិច្ចជាតិ ស្របទៅនឹងប្រសាសន៍ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានលើកឡើងក្នុងពីធីប្រគល់សញ្ញាបត្រដល់និស្សិតនៅសាកលវិទ្យាល័យភូមិន្ទកសិកម្ម និងសាលាជាតិកសិកម្មព្រែកលៀប នាថ្ងៃទី១០ ខែកុម្ពៈ ឆ្នាំ២០១១ថា វិស័យកសិកម្មជាវិស័យអាទិភាពបំផុត បើយើងមើលរំលងវិស័យនេះ គីជាកំហុសមួយធំណាស់។
