ឯកឧត្តមរដ្ឋមន្រ្តី វេង សាខុន បានអនុញ្ញាតឲ្យ ឯកឧត្តម ស៊ីម៉ុន រ៉ូដីដ ឯកអគ្គរដ្ឋទូត អ៊ីស្រាអែល ចូលជួបសម្តែងការគួរសមនៅឯសណ្ឋាគារ សុខាអង្គរ ខេត្តសៀមរាប

ចេញ​ផ្សាយ​ ១៩ កុម្ភៈ ២០១៨ 2619

នៅព្រឹកថ្ងៃទី២១ ខែវិច្ជិកា ឆ្នាំ២០១៦ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យ ឯកឧត្តម ស៊ីម៉ុន រ៉ូដីដ ឯកអគ្គរដ្ឋទូតអ៊ីស្រាអែល ចូលជួបសម្តែងការគួរសមនៅឯសណ្ឋាគារ សុខាអង្គរ ខេត្តសៀមរាប។ គោលបំណងនៃកិច្ចជំនួបគឺ ដើម្បីពិភាក្សាលើការបន្តពង្រឹងកិច្ចសហប្រតិបត្តិការ លើវិស័យ កសិកម្មរវាងប្រទេសទាំងពីរ។ ឯកឧត្តមរដ្ឋមន្រ្តី បានមានមតិស្វាគមន៏ និងថ្លែងអំណរគុណដល់រដ្ឋាភិបាលអ៊ីស្រាអែល ដែលបានផ្តល់កិច្ចសហប្រតិបត្តិល្អជាមួយកម្ពុជា និងបានរៀបចំដំណើរទស្សនកិច្ចកន្លងមកប្រកបដោយជោគជ័យ។ ឯកឧត្តមរដ្ឋមន្រ្តី បានសម្តែងការចាប់អារម្មណ៏ខ្លាំងទៅលើការវិវឌ្ឍន៏ផ្នែកបច្ចេកវិទ្យាកសិកម្មនៅប្រទេសអ៊ីស្រាអែល ដែលបានឈានដល់ចំណុចកំពូលដែលកម្ពុជាគួរចាប់អារម្មណ៏ និងពិនិត្យពិចារណាក្នុងការផ្ទេរនូវបច្ចេកវិទ្យាទាំងនោះមកកម្ពុជា ដើម្បីជំរុញប្រសិទ្ធភាព និងនិរន្តភាពនៃការ អភិវឌ្ឍន៏វិស័យកសិកម្មនៅកម្ពុជា។ ឯកឧត្តមឯកអគ្គរដ្ឋទូត បានថ្លែងអំណរគុណចំពោះឯកឧត្តមរដ្ឋមន្រ្តី ដែលបានអនុញ្ញាតឲ្យ ឯកឧត្តមចូលជួបសម្តែងការគួរសម និង ពិភាក្សាការងារ។ ឯកឧត្តមបានបញ្ជាក់ថា រដ្ឋាភិបាលមានអ៊ីស្រាអែលបំណងសហការផ្តល់នូវការបណ្តុះបណ្តាលបច្ចេកទេស និងបច្ចេកវិទ្យាកសិកម្មដល់កសិករ និងសហគមកសិកម្ម ដើម្បីបង្កើនល្បឿននៃការ អភិវឌ្ឍន៏កសិកម្មនៅកម្ពុជា។ ឯកឧត្តមឯកអគ្គរដ្ឋទូត បានស្នើឲ្យ ក្រសួងកសិកម្ម រុក្ខាប្រមាញ់ និងនេសាទ រៀបចំសេចក្តី ព្រាងកិច្ចព្រមព្រៀងកិច្ចសហប្រតិបត្តិការរវាងអ៊ីស្រាអែល និងកម្ពុជាស្តីពីការផ្ទេរបច្ចេកទេស និងបច្ចេកវិទ្យានៅក្នុងវិស័យកសិកម្មពីប្រទេសអ៊ីស្រាអែលមកកម្ពុជា។ ឆ្លៀតក្នុងឱកាសនេះ ឯកឧត្តម ឯកអគ្គរដ្ឋទូត បានស្នើ ឲ្យរាជរដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ ជួយសហការ និងគាំទ្រដល់ការវិនិយោគរបស់ វិស័យឯកជនមកពីប្រទេសអ៊ីស្រាអែល ដើម្បីឲ្យការវិនិយោគទាំងនោះទទួលបានជោគជ័យ និងចូលរួមចំណែកក្នុងការអភិវឌ្ឍន៏វិស័យកសិកម្មនៅកម្ពុជាផងដែរ។ ជាមួយគ្នានេះ ឯកឧត្តមឯកអគ្គរដ្ឋទូត ក៏មានបំណងសហការជាមួយក្រសួងកសិកម្ម រុក្ខាប្រមាញ់ និងនេសាទ រៀបចំសិក្ខាសាលាស្តីពីការផ្សព្វផ្សាយនូវលទ្ធផល នៃការបណ្តុះ បណ្តាលរបស់ និស្សិតកសិកម្មកម្ពុជានៅឯប្រទេសអ៊ីស្រាអែល និងបង្កើតសមាគមអតីតនិស្សិតកសិកម្មកម្ពុជាមកពីអ៊ីស្រាអែល ដើម្បីពង្រីក និងចែករំលែកនូវចំណេះដឹង ផ្នែកកសិកម្មឲ្យបានទូលំទូលាយ។