ឯកឧត្តម តូច ប៊ុនហួរ រដ្ឋលេខាធិការ ក្រសួងកសិកម្ម តំណាងឯកឧត្តមរដ្ឋមន្ដ្រី ឌិត ទីណា អញ្ជើញចូលរួមពិធីសន្និសីទស្វាយចន្ទីពិភពលោកលើកទី១០ នៅខេត្តសៀមរាប

ចេញ​ផ្សាយ​ ០១ កុម្ភៈ ២០២៤ 2190

នៅថ្ងៃទី១ ខែកុម្ភៈ ឆ្នាំ២០២៤នេះ ឯកឧត្តម តូច ប៊ុនហួរ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងឯកឧត្តមរដ្ឋមន្ដ្រី ឌិត ទីណា បានអញ្ជើញចូលរួមបើកពិធីសន្និសីទស្វាយចន្ទីពិភពលោកលើកទី១០ នៅខេត្តសៀមរាប ក្រោមអធិបតីភាពដ៏ខ្ពង់ខ្ពស់ របស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ។

សន្និសីទនេះរៀបចំដោយសហព័ន្ធស្វាយចន្ទីកម្ពុជា សហការជាមួយក្រុមហ៊ុន Eventell Global Advisory ក្រោមកិច្ចសម្របសម្រួលដោយក្រសួងពាណិជ្ជកម្មកម្ពុជា និងមានរយ:ពេល ៣ថ្ងៃ គឺចាប់ពីថ្ងទី១ ដល់ទី៣ ខែកុម្ភ: ឆ្នាំ២០២៤ នៅសណ្ឋាគារសុខា ខេត្តសៀមរាប។

ដោយមើលឃើញពីសក្តានុពលស្វាយចន្ទី ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ដល់អង្គពិធីថា សម្តេចមហាបវរធិបតី ហ៊ុន ម៉ាណែត បានផ្តល់ការណែនាំដ៏ខ្ពង់ខ្ពស់ ដល់គណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ ដឹកនាំរៀបចំ និងដាក់ចេញនូវវិធានការចាំបាច់នានា ក្នុងការជំរុញការកែច្នៃ និងការនាំចេញផលិតផលស្វាយចន្ទី រួមមាន ការពង្រឹងនិងពង្រីកការនាំចេញគ្រាប់ស្វាយចន្ទី ដោយចាប់ផ្តើមពីផលិតផលពាក់កណ្តាលសម្រេចជាមុនសិន ពោលគឺផ្តោតការនាំចេញគ្រាប់ស្វាយចន្ទីស្ងួត ហើយជំហានបន្ទាប់ត្រូវពង្រីកការកែច្នៃគ្រាប់ស្វាយចន្ទី និងបន្តពង្រឹងទីផ្សារស្វាយចន្ទីកម្ពុជា រួមទាំងជំរុញការចងក្រង និងការបង្កើតសហគមន៍បែបថ្មី ព្រមទាំងពិនិត្យលទ្ធភាពក្នុងការបង្កើនទុនបង្វិល សម្រាប់ប្រមូលទិញគ្រាប់ស្វាយចន្ទីសម្រាប់កែច្នៃក្នុងស្រុក បង្កើនទុនវិនិយោគលើហេដ្ឋារចនាសម្ព័ន្ធសម្រាប់ស្តុក និងកែច្នៃ។

សម្តេចបវរធិបតី ហ៊ុន ម៉ាណែត  បានដាក់ចេញនូវវិធានការមុតស្រួចជាកញ្ចប់ ដើម្បីពិនិត្យនិងដោះស្រាយបញ្ហាប្រឈម និងកង្វល់ពាក់ព័ន្ធនឹងវិស័យឯកជន និងធុរជន  ពាក់ព័ន្ធដោយផ្ទាល់លើវិស័យកសិកម្ម និងស្វាយចន្ទី ដោយផ្តល់ការលើកទឹកចិត្តពន្ធដារ ២ឆ្នាំថែមទៀតចំពោះសហគ្រាសកែច្នៃផ្គត់ផ្គង់ក្នុងស្រុក ឬនាំចេញ មានដូចជា ស្រូវ អង្ករ ពោត សណ្តែក ដំឡូងមី គ្រាប់ស្វាយចន្ទី ម្រេច និងជ័រកៅស៊ូ និងបន្តលើកលែងប្រាក់រំដោះពន្ធដារលើប្រាក់ចំណូលចំពោះសហគ្រាស ដាំដុះ ផលិត និងផ្គត់ផ្គង់ ឬនាំចេញផលិតផលកសិកម្ម បូករួមទាំងគ្រាប់ស្វាយចន្ទី រយ:ពេល ២ឆ្នាំ (២០២៤-២០២៥)។

ទន្ទឹមនឹងរាជរដ្ឋាភិបាលបានដាក់ចេញនូវវិធានផ្សេងទៀត ដែលពាក់ព័ន្ធដោយប្រយោល រួមមានផ្តល់កិច្ចសម្រួលពាណិជ្ជកម្ម ការអនុគ្រោះពន្ធដារ បញ្ចុះថ្លៃអគ្គីសនី ជូនអតិថិជនកសិកម្ម និងឧស្សាហកម្ម ការដឹកជញ្ជូន និងការសម្រួលជាច្រើនផ្សេងទៀត។

ចំពោះតម្រូវការហិរញ្ញប្បទានសម្រាប់អភិវឌ្ឍវិស័យស្វាយចន្ទី រាជរដ្ឋាភិបាលក៏បានដាក់ចេញនូវវិធានការ ក្នុងការផ្តល់ប្រភពហិរញ្ញប្បទាន តាមរយ: ធនាគារ ARDB នូវឥណទាន ប្រមាណ៣៥ លានដុល្លាអាមេរិក សម្រាប់ខ្សែច្រវាក់ផលិតកម្មស្វាយចន្ទី និងទុនត្រៀមបម្រុងប្រមាណ៣០ លានដុល្លាអាមេរិកទៀត សម្រាប់រដូវប្រមូលផល ក្នុងឆ្នាំ២០២៤នេះ ៕