ឯកឧត្តមរដ្ឋមន្រ្តី វេង សាខុន បានទទួលជួបឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា ដឹកនាំប្រតិភូអញ្ជើញមកពីក្រុមហ៊ុននាំមុខធំៗផ្នែកវិស័យកសិកម្មនៅសហរដ្ឋអាមេរិកចូលជួបសំដែងការគួរសម និងពិភាក្សាការងារ

ចេញ​ផ្សាយ​ ០៧ កុម្ភៈ ២០២០ 3424

នៅទីស្តីការក្រសួង វេលាម៉ោង ១៥:៣០ រសៀលថ្ងៃព្រហស្បតិ៍ ១៣កើត ខែមាឃ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី០៥ ខែកុម្ភ: ឆ្នាំ២០២០ ឯកឧត្តមរដ្ឋមន្រ្តី វេង សាខុន បានទទួលជួបឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា
ដឹកនាំប្រតិភូអញ្ជើញមកពីក្រុមហ៊ុននាំមុខធំៗផ្នែកវិស័យកសិកម្មនៅសហរដ្ឋអាមេរិកចូលជួបសំដែងការគួរសម និងពិភាក្សាការងារ។

ជាបឋម ឯកឧត្តមឯកអគ្គរដ្ឋទូតបានថ្លែងអំណរគុណឯកឧត្តមរដ្ឋមន្រ្តីដែលបានអនុញ្ញាតឱ្យគណ:ប្រតិភូដែលអញ្ជើញមកពីក្រុមហ៊ុននាំមុខធំៗផ្នែកវិស័យកសិកម្មនៅសហរដ្ឋអាមេរិកចូលជួបសម្តែងការគួរសម និងពិភាក្សាការងារសំខាន់ៗទាក់ទងវិស័យកសិកម្ម។ ជំនួបនាពេលនេះមានគោលបំណងទី១- ចូលរួមក្នុងព្រឹត្តិការណ៍ប្រចាំឆ្នាំលើកទី២ ស្តីពី "ឱកាសនែការធ្វើកសិ-ពាណិជ្ជកម្មកម្ពុជា ២០២០ (Business Opportunities in Cambodia's Agriculture Sector 2020)" ដែលព្រឹត្តិការណ៍នេះត្រូវបានរៀបចំឡើងរៀងរាល់ឆ្នាំដោយស្ថានទូតសហរដ្ឋ អាមេរិកចាប់ពីថ្ងៃទី០៦-០៧ ខែកុម្ភ: នៅ Ross Wood Hotel ទី២- ធ្វើការសិក្សាស្វែងយល់ឱ្យបានស៊ីជម្រៅបន្ថែមអំពីគោលនយោបាល និងលក្ខខណ្ឌវិនិយោគរបស់រាជរដ្ឋាភិបាល ក៏ដូចជារបស់ក្រសួង ទី៣- ពិនិត្យលើសក្តានុពលវិស័យកសិកម្ម ដើម្បីពិនិត្យលទ្ធភាពវិនិយោគ។

ជាកិច្ចចាប់ផ្តើម ឯកឧត្តមរដ្ឋមន្ត្រីបានសម្តែងអំណរអរគុណយ៉ាងជ្រាលជ្រៅជូនចំពោះរដ្ឋាភិបាលសហរដ្ឋអាមេរិកតាមរយ:អង្គការ USAID ដែលបានជួយឧបត្ថម្ភថវិកាសម្រាប់អនុវត្តគម្រោងទាក់ទងការអភិវឌ្ឍន៍វិស័យកសិកម្ម ហើយដែលសមិទ្ធផលនៃការអនុវត្តគម្រោងបាននិងកំពុងផ្តល់ប្រយោជន៍ទាំងផ្នែកសេដ្ឋកិច្ចគ្រួសារ កំណើនប្រាក់ចំណូល កំណើនទិន្នផល តម្លៃបន្ថែម និងស្ថិរភាពទីផ្សារ។ ក្រៅពីគម្រោង អង្គការUSAID តាមរយ:ស្ថានទូតបានខិតខំរៀបចំព្រឹត្តិការណ៍ស្តីពី "ឱកាសនែការធ្វើកសិ-ពាណិជ្ជកម្មកម្ពុជា ២០២០ (Business Opportunities in Cambodia's Agriculture Sector 2020)" រៀងរាលឆ្នាំដែលព្រឹត្តិការណ៍នេះបានផ្តល់ឱកាសឱ្យក្រុមហ៊ុននាំមុខធំៗផ្នែកវិស័យកសិកម្មសហរដ្ឋអាមេរិកបានស្វែងយល់ស៊ីជម្រៅអំពីគោលនយោបាយ និងលក្ខខណ្ឌអំណោយផលសំខាន់ៗរបស់រាជរដ្ឋាភិបាល ក៏ជារបស់ក្រសួង។ ម៉្យាងវិញទៀត វាក៏ជាឱកាសសម្រាប់ក្រុមហ៊ុន ឬអាជីវករក្នុងស្រុកធ្វើការពង្រីកទំនាក់ទំនង ចែក រំលែកព័ត៌មានស្តីពីវិស័យកសិកម្ម កសិ-ឧស្សាហកម្ម និងការវិនិយោគនាពេលអនាគត។ល។

ឆ្លៀតយកឱកាសនេះ ឯកឧត្តមរដ្ឋមន្ត្រីបានជម្រាបជូនភ្ញៀវដោយសង្ខេបអំពីវឌ្ឍនភាពវិស័យកសិកម្ម ការចូលរួមរក្សាកំណើនសេដ្ឋកិច្ច គោលនយោបាយ និងផែនការយុទ្ធសាស្រ្តអភិវឌ្ឍន៍វិស័យកសិកម្ម២០១៩-២០២៣ រួមទាំងគោលនយោបាយយុទ្ធសាស្រ្តចតុកោណដំណាក់ទី៤ របស់រាជរដ្ឋាភិបាល។ល។ សម្រាប់ជំនួបពិភាក្សាដ៏មានសារសំខាន់នាពេលនេះ ឯកឧត្តមរដ្ឋមន្ត្រីបានសម្តែងការស្វាគមន៍យ៉ាងកក់ក្តៅចំពោះវត្តមានរបស់ឯកឧត្តមឯកអគ្គរដ្ឋទូត និងគណ:ប្រតិភូ និងជាពិសេសបានសម្តែងនូវឆន្ទ:គាំទ្រ និងសហការពេញទំហឹងជាមួយក្រុមហ៊ុនដែលបាននិងកំពុងធ្វើការវិនិយោគ និងកំពុងមានគម្រោងវិនិយោគលើវិស័យកសិកម្មនាពេលអនាគត។

កិច្ចពិភាក្សាបានដំណើរការទៅដោយរលូន ដោយតំណាងក្រុមហ៊ុននីមួយៗបានចោទជាសំណួរជាច្រើនទាក់ទងនឹងអនុវិស័យកសិកម្ម (ដំឡូងបារាំង) ផលិតកម្មសត្វ (គោទឹកដោះ) ចំណីសត្វ ការអនុវត្តបច្ចេកវិទ្យាទំនើបទាន់សម័យ មូលដ្ឋានគ្រឹះនៃការជួយកសិករដើម្បីបង្កើនផលិតភាព ផលិតកម្ម បច្ចេកវិទ្យា និងទីផ្សារ គុណភាព និងសុវត្ថីភាពកសិផល។ល។ សំណួរមួយចំនួនធំត្រូវបានឆ្លើយដោយឯកឧត្តមរដ្ឋមន្រ្តី និងមួយចំនួនទៀតលោកបានឱ្យក្រុមហ៊ុនទាក់ទងដោយផ្ទាល់ទៅប្រធានស្ថាប័នជំនាញនីមួយៗដើម្បីទទួលបានឆ្លើយលម្អិត រួមទាំងទិន្នន័យមួយចំនួនទៀត ក្នុងពេលសមស្របណាមួយ។ ជាទីបញ្ចប់ ឯកឧត្តមឯកអគ្គរដ្ឋទូតក្នុងនាមឱ្យរដ្ឋាភិបាលសហរដ្ឋអាមេរិក និងក្នុងនាមគណ: ប្រតិភូ បានថ្លែងអំណរគុណយ៉ាងជ្រាលជ្រៅជូនចំពោះឯកឧត្តមរដ្ឋមន្រ្តី និងសហការីដែលបានចំណាយពេលដើម្បីជួបពិភាក្សាលើប្រធានបទសំខាន់ៗនាពេលនេះ ហើយចម្លើយដែលទទួលបានពិតជាជួយដោះស្រាយបញ្ហាចំបងៗមួយចំនួនដែលក្រុមហ៊ុនបានជួបប្រទះ និងបានបង្ហាញ ពីឆន្ទ:ជួយគាំទ្រ និងសហការធ្វើយ៉ាងណាឱ្យធុរកិច្ចកសិកម្មរបស់ក្រុមហ៊ុនអាមេរិកនៅកម្ពុជាដំណើរការប្រកបដោយនិរន្តរភាព និងទទួលបានជោគជ័យ។