ឯកឧត្តមរដ្ឋលេខាធិការ គង់ ច័ន្ទវាសនា បន្តដឹកនាំក្រុមការងារចុះត្រួតពិនិត្យ និងពង្រឹងការគ្រប់គ្រងអាជីវកម្មជី​និងថ្នាំកសិកម្ម ក្នុងខេត្តបាត់ដំបង

ចេញ​ផ្សាយ​ ០៥ កញ្ញា ២០២៤ 646

នៅថ្ងៃទី៤​ ខែកញ្ញា ឆ្នាំ២០២៤ ឯកឧត្តម​ គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ​ បានបន្តដឹកនាំក្រុមការងារក្រសួងចុះត្រួតពិនិត្យ និងពង្រឹងការគ្រប់គ្រងអាជីវកម្មជី​និងថ្នាំកសិកម្ម ក្នុងខេត្ត​បាត់ដំបងជាបន្តទៀត​ បន្ទាប់ពីខេត្តបន្ទាយមានជ័យ​។

ឯកឧត្តមបានជួបពិភាក្សាការងារ​ជាមួយលោក​ ផេន សិទ្ធី អភិបាលរងខេត្ត​ អំពីសមិទ្ធផលការងាររបស់រដ្ឋបាលខេត្តក្នុងវិស័យកសិកម្ម​ និងការអន្តរាគមន៍របស់ក្រសួង​ និងរដ្ឋបាលខេត្ត ​ជួយដល់ប្រជាកសិករនៅពេលជួបបញ្ហាប្រឈមនាពេលថ្មីៗនេះ​ ដូចជាគ្រោះរាំងស្ងួត​ និងបញ្ហាសត្វល្អិតចង្រៃ។

ក្នុងជំនួបនេះ​ ឯកឧត្តមរដ្ឋលេខាធិការបានកោតសរសេីរមន្ទីរកសិកម្មខេត្ត​ ចំពោះសកម្មភាពបង្ក្រាប​ និងទប់ស្កាត់ការ​នាំចូល​ និងចរាចរណ៍ជី​និងថ្នាំកសិកម្មខុសច្បាប់​ជាបន្តបន្ទាប់ ព្រមទាំងបានសំណូមពរ​ និងលេីក​ទឹកចិត្ត​ឱ្យរដ្ឋបាលខេត្ត​ មន្ទីរកសិកម្មខេត្ត​ អាជ្ញាធរពាក់ព័ន្ធ និងសមត្ថកិច្ចប្រចាំការនៅតាមច្រកព្រំដែន​ បន្តចូលរួម​សហការ​ និងបង្កេីនការទប់ស្កាត់ការ​នាំចូល​ និងចរាចរណ៍ជី​និងថ្នាំកសិកម្មខុសច្បាប់​ ជាពិសេសប្រភេទថ្នាំកសិកម្មហាមឃាត់​ ដេីម្បី​ការពារផលប្រយោជន៍​ប្រជាកសិករ​ និងអាជីវករស្របច្បាប់​ និងសុខភាពសាធារណ:​ និងបរិស្ថាន​ផងដែរ។ ជាការឆ្លេីយតប​ រដ្ឋបាលខេត្តបានសម្តែងនូវការគាំទ្រ​ និងកិច្ចសហការកាន់តែជិតស្និទ្ធ​ថែមទៀតលេីការងារនេះ​ និងធ្វេីការ​ណែនាំដល់សមត្ថកិច្ចពាក់ព័ន្ធចូលរួមអនុវត្តឱ្យមានប្រសិទ្ធភាពខ្ពស់។

ក្រោយកិច្ចពិភាក្សា​ ឯកឧត្តមរដ្ឋលេខាធិការ និងក្រុមការងារ​ អមដំណេីរ​ដោយលោកអភិបាលរងខេត្ត​ និងមន្ទីរកសិកម្ម​ បានអញ្ជេីញចុះពិនិត្យការធ្វេីអាជីវកម្មជី​និងថ្នាំកសិកម្មនៅតាមដេប៉ូមួយចំនួន និង​ចុះជួបសមត្ថកិច្ចនៅតាមច្រកព្រំដែនសំខាន់ៗ​ ដូចជាច្រកតំបន់​អូររំដួល និងច្រកអន្តរជាតិដូង ដោយទទួលបានកិច្ចសហការជិតស្និទ្ធ​លេីការទប់ស្កាត់ការ​នាំចូល​ និងចរាចរណ៍ជី​និងថ្នាំកសិកម្ម​ខុសច្បាប់។

ជារួម​ ក្រុមការងារវាយតម្លៃបានថា​ បេសកកម្ម​ចុះត្រួតពិនិត្យ​ និងពង្រឹងការគ្រប់គ្រងជីនិងថ្នាំកសិកម្ម​ ក្នុងខេត្តជាប់ព្រំដែនចំនួន២ គឺខេត្តបន្ទាយ​មានជ័យ​ និងបាត់ដំបងនាពេលនេះ​ ទទួល​បានជោគជ័យ​ និងលទ្ធផលល្អប្រសេីរតាម​ការរំពឹងទុក​ ដេីម្បីជាប្រយោជន៍ដល់ប្រជាកសិករ​ និងអាជីវករស្របច្បាប់៕