ឯកឧត្តម រដ្ឋមន្រ្តី និងគណប្រតិភូបានអញ្ជើញចូលរួមកិច្ចប្រជុំថ្នាក់រដ្ឋមន្រ្តីកសិកម្មនិងព្រៃឈើអាស៊ានលើកទី៤១ (41st AMAF Meeting)

ចេញ​ផ្សាយ​ ១៦ តុលា ២០១៩ 18611

នៅព្រឹកថ្ងៃអង្គារ ២រោច ខែអស្សុជ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៥ ខែតុលា ឆ្នាំ២០១៩ ដដែល ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងគណប្រតិភូបានអញ្ជើញចូលរួមកិច្ចប្រជុំថ្នាក់រដ្ឋមន្រ្តីកសិកម្មនិងព្រៃឈើអាស៊ានលើកទី៤១ (41st AMAF Meeting)។ អង្គប្រជុំបានរាយការណ៍នូវវឌ្ឍនៈភាព នៃការអនុវត្តក្របខណ្ឌគោលនយោបាយពាក់ព័ន្ធទៅនឹងកិច្ចសហប្រតិបត្តិការផ្នែកចំណីអាហារ កសិកម្ម និងព្រៃឈើក្នុងឆ្នាំ២០១៩ដូចជា៖
• ស្តង់ដារការអនុវត្តផលិតកម្មល្អអាស៊ាន (ASEAN GMP) សម្រាប់ការផលិតផលបសុឱសថ
• វិធីសាស្រ្តត្រួតពិនិត្យផ្លូវការការអនុវត្តកសិកម្មល្អអាស៊ាន (ASEAN GAP) និងវិធីសាស្រ្តបញ្ជាក់ការអនុវត្តកសិកម្មល្អអាស៊ាន សម្រាប់ប្រព័ន្ធធានាគុណភាពដល់បន្លែនិងផ្លែឈើអាស៊ាន
• យុទ្ធសាស្រ្តក្នុងតំបន់អាស៊ានសម្រាប់ការត្រួតពិនិត្យ និងការពារជម្ងឺប៉េស្តជ្រូុក (២០១៩-២០២៥)
• គោលការណ៍បច្ចេកទេសក្នុងតំបន់នូវប្រព័ន្ធព្រមានជាមុនសម្រាប់ការសង្រ្គោះបន្ទាន់សុខភាពសត្វពីជលផល
• សំណើជាគំនិតក្នុងការបង្កើតបណ្តាញអាស៊ានសម្រាប់ប្រយុទ្ធប្រឆាំងនឹងការនេសាទខុសច្បាប់ មិនមានការអនុញ្ញាត និងមិនមានការរាយការណ៍
• គោលការណ៍អាស៊ានសម្រាប់ការរកឃើញនិងការពារការជួញដូរសត្វព្រៃ
សម្រាប់ការអនុវត្តក្របខណ្ឌគោលនយោបាយដែលពាក់ព័ន្ធដល់កិច្ចសហប្រតិបត្តិការអាស៊ានផ្នែកចំណីអាហារ កសិកម្ម និងព្រៃឈើក្នុងឆ្នាំ២០២០ កិច្ចប្រជុំបានលើកស្នើដល់ប្រទេសជាសមាជិកពិនិត្យនិងសម្រេចនូវកិច្ចសហប្រតិបត្តិការមួយចំនួនដូចជា៖
• ផ្នែកបុសសត្វៈ រៀបចំវិធីសាស្រ្តាសម្រាប់ការអនុវត្តផលិតកម្មល្អនិងការឆ្លើយតបបន្ទាន់ទៅនឹងជម្ងឺឆ្លង
• ផ្នែកដំណាំៈ សុខដុមនីយកម្មអាស៊ាននៃសារធាតុសំណល់កសិកម្ម គោលការណ៍ភូតគាមអនាម័យអាស៊ានសម្រាប់ការនាំចូលផលិតផលកសិកម្មអាទិភាព និងស្តង់ដារអាស៊ានសម្រាប់ដំណាំសាកវប្បកម្ម
• ផ្នែកជលផលៈ ការដោះស្រាយការនេសាទប្រកបដោយចីរភាព សម្រាប់ធានាសន្តិសុខស្បៀងដល់តំបន់អាស៊ាន និងគម្រោងប្រឆាំងនឹងការប្រើប្រាស់ថ្នាំសម្លាប់មេរោគ (AMR) ក្នុងវារីវប្បកម្ម
• ផ្នែកព្រៃឈើៈ ការពិនិត្យឡើងវិញនូវលក្ខណៈវិនិច្ឆ័យអាស៊ាន និងកសាងនីត្យានុកូលភាពព្រៃឈើ និងគោលការណ៍អាស៊ានសម្រាប់ពិធីសារក្នុងការគ្រប់គ្រងធនធាននិងប្រមូលផលឈើ មិនមែនឈើព្រៃប្រកបដោយចីរភាព
បន្ទាប់ពីបញ្ចប់កិច្ចប្រជុំរដ្ឋមន្រ្តីកសិកម្មនិងព្រៃឈើលើកទី៤១រួចមក ឯកឧត្តមរដ្ឋមន្ត្រី បានអញ្ជើញចូលរួមពិធីចុះហត្ថលេខារួម លើអនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការអាស៊ានលើ គម្រោងការលើកកម្ពស់ផលិតផលកសិកម្មនិងព្រៃឈើឆ្នាំ២០១៩-២០២៤ ដើម្បីពង្រឹងកិច្ចសហប្រតិបត្តិការក្នុងតំបន់។