ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញចុះពិនិត្យ វាយតម្លៃស្ថានភាពជាក់ស្តែងនៅស្ថានីយ៏បូមទឹកហ៊ុន សែនទី៨ ប្រឡាយក្រហមក ខេត្តតាកែវ

ចេញ​ផ្សាយ​ ១៣ កុម្ភៈ ២០១៨ 2807

ក្រោយពីទទួលបានសេចក្ដីរាយការណ៍ពីមន្ទីរកសិកម្មខេត្តតាកែវអំពីស្ថានភាពកង្វះទឹក នៅស្រុកបាទី ខេត្តតាកែវរួចមក នៅព្រឹកថ្ងៃទី១៧ ខែ សីហា ឆ្នាំ២០១៦ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះពិនិត្យ វាយតម្លៃស្ថានភាពជាក់ស្តែង ដោយបានចុះដល់ទីតាំងស្ថានីយ៏បូមទឹកហ៊ុន សែនទី៨ ប្រឡាយក្រហមក ដែលមានទីតាំងស្ថិតនៅភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ ដើម្បីធ្វើការអន្តរាគមន៍សង្រ្គោះដីស្រែវស្សាប្រមាណ ១៨៥៩ ហិកតា។

តាមសេចក្តីរាយការណ៍របស់ក្រុមប្រឹក្សាឃុំបានឲ្យដឹងថា មន្ទីរកសិកម្មខេត្តតាកែវបានចូលរួមអន្តរាគមន៍បូមទឹកពីទន្លេបាទី ទៅកាន់ប្រឡាយក្រហមក ចាប់តាំងពីថ្ងៃទី១០ ខែសីហា ឆ្នាំ ២០១៦ មកម្ល៉េះ។ គិតមកដល់ពេល នេះដីស្រែប្រមាណ ៨០% នៃផ្ទៃដីសរុប ១៨៥៩ហិកតា ត្រូវបានសង្រ្គោះ ដោយបានប្រើប្រាស់ប្រេងអស់ប្រមាណ ២៩០០លីត្រ។ ក្នុងឱកាសនោះ ឯកឧត្តមរដ្ឋមន្រ្តី បានឧបត្ថម្ភប្រេងចំនួន ១០០០លីត្រ បន្ថែម ដើម្បីបន្តអន្តរាគមន៍ជួយសម្រួលដល់ការបង្កបង្កើនផលរបស់ប្រជាពលរដ្ឋបានទាន់ពេលវេលា។

តាមរបាយការណ៍របស់ការិយាល័យកសិកម្មស្រុកបាទី បានបង្ហាញថា នៅដើមខែសីហា ឆ្នាំ២០១៦ នេះ ស្រុកបាទីបាននិងកំពុងជួបបញ្ហាប្រឈមភាពខ្វះខាតទឹក ដែលធ្វើអោយប៉ះពាល់ដល់ស្រូវវស្សា សំណាប សន្ទូង និងស្រូវពង្រោះ ក្នុងឃុំទាំង១៥ នៃស្រុកបាទី ដែលមានផ្ទៃដីប៉ះពាល់ប្រមាណ ៥៧០០ហិកតា។

ស្ថិតក្នុងស្ថានភាពនេះ ឯកឧត្តមរដ្ឋមន្រ្តី បានផ្តាំផ្ញើ និងណែនាំដល់ក្រុមប្រឹក្សាឃុំ និងមន្ទីរកសិកម្មខេត្ត រួមសហការជាមួយមន្ទីរធនធានទឹក និងឧតុនិយម ខេត្តតាកែវ ដើម្បីបន្តកិច្ចការងារនេះឲ្យបានសកម្មខ្លាំងក្លាដើម្បីអន្តរាគមន៍ជួយសង្គ្រោះស្រូវរបស់ប្រជាកសិករដែលខ្វះខាតទឹកឲ្យបានទាន់ពេលវេលា។

គួរកត់សម្គាល់ថា ជារួមការបង្កបង្កើនផលស្រូវរដូវវស្សាឆ្នាំ២០១៦ តាមផែនការ ១៧០ ០០០ ហិកតា គឺស្ទូងនិងព្រោះបាន ១៦១ ៤៨៤ ហិកតា ស្មើនឹង ៩៣,៨៨% នៃផែនការ គឺលើសឆ្នាំ២០១៥ ក្នុងរយៈពេលដូចគ្នាចំនួន ៣៩ ០២៨ហិកតា។