ព័ត៌មានផ្សេងៗទៀត
ឯកឧត្តមឧបនាយករដ្ឋមន្ត្រីជួបភ្នាក់ងារផ្សព្វផ្សាយកសិកម្មភូមិ
ចេញផ្សាយ ២២ មករា ២០១៨ 2953
កាលពីចុងសប្តាហ៍នេះ ឯកឧត្តមឧបនាយករដ្ឋមន្ត្រី យឹម ឆៃលី និងជាប្រធានក្រុមប្រឹក្សាស្តារ និងអភិវឌ្ឍន៍កសិកម្មកម្ពុជា រួមដំណើរជាមួយឯកឧត្តមបណ្ដិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ព្រមទាំងមន្ត្រីជាច្រើនរូបទៀត បានអញ្ជើញចូលរួម ក្នុងពិធីសំណេះសំណាល ជាមួយប្រជាកសិករចំនួន៣០០គ្រួសារ ដែលមានភ្នាក់ងារ ផ្សព្វផ្សាយកសិកម្មភូមិ កសិករស្ម័គ្រចិត្តផលិតពូជស្រូវ នៅឃុំឈូកខ្សាច់ ស្រុកបារាយណ៍។
នៅចំពោះមុខកសិករទាំងនោះ ឯកឧត្តមរដ្ឋមន្ត្រី បានផ្តល់នូវអនុសាសន៍សំខាន់ៗជុំវិញការងារបច្ចេកទេស នៃការដាំដុះដណាំស្រូវជូន។ ឯកឧត្តមបានមានប្រសាសន៍ថា ចាប់ពីតាំងពី រាជរដ្ឋាភិបាលដែលមានសម្តេចតេជោ ហ៊ុន សែន ជានាយករដ្ឋមន្ត្រី ដាក់ចេញនូវគោលនយោបាយរបស់ រដ្ឋាភិបាលសម្រាប់ឆ្នាំ២០១៥ កម្ពុជាត្រូវផលិតស្រូវឱ្យបាន៤លានតោន ដើម្បីនាំចេញអង្ករឱ្យបាន១លានតោនក្នុងមួយឆ្នាំ និងត្រូវធ្វើយ៉ាងណាឱ្យអន្តរជាតិទទួលស្គាល់គុណភាពអង្ករកម្ពុជាបាននោះ ក្រសួងកសិកម្ម រុក្ខាប្រមាញ់និងនេសាទ បានខិតខំយកអស់កម្លាំង អនុវត្តនូវភារកិច្ចរបស់ខ្លួនដោយស្មារតីទទួលខុសត្រូវខ្ពស់ ដើម្បីទទួលបានជោគជ័យតាមផែន ការរបស់រដ្ឋាភិបាល។
ឯកឧត្តមបានបញ្ជាក់ថា អ្វីដែលជាគន្លឹះសំខាន់ ឈានទៅសម្រេចគោលនយោបាយនេះ គឺកសិករត្រូវទទួលយកបច្ចេកវិជ្ជា ប.វ.ស ទៅអនុវត្ត។ ប្តូរទម្លាប់ពីការព្រោះស្រូវមកស្ទូងវិញ។ ការធ្វើដោយព្រោះខាតពូជស្រូវដុះញឹកមិនបែកគុម្ព សន្ទូងដុះលូតលាស់យឺត ព្រោះខ្វះជី ពន្លឺ ខ្យល់ ជាប្រភពរស់នៅរបស់សត្វល្អិតចង្រៃ ពិបាកមើលថែទាំស្មៅ មានឱកាសកើនជម្ងឺច្រើន។
ឯកឧត្តមបន្តទៀតថា ពូជជាកត្តាសំខាន់ក្នុងការ បង្កើនទិន្នផលស្រូវ។ ពូជសុទ្ធទិន្នផលកាន់តែខ្ពស់។ បើដូច្នេះ មន្ទីរកសិកម្មខេត្តអគ្គនាយក ដ្ឋានដំណាំស្រូវត្រូវចុះមកពន្យល់ណែនាំឱ្យប្រជាកសិករប្តូរពូជ និងផ្សព្វផ្សាយពូជទាំង១០ ដែលរាជរដ្ឋាភិបាលបានអនុម័តឱ្យប្រើប្រាស់រួចហើយ។
ឯកឧត្តមបន្តថា នាយកដ្ឋានដំណាំស្រូវ ក៏ដូចជាមន្ទីរកសិកម្មត្រូវរៀបចំផែនការធ្វើ ប.វ.ស ឱ្យបានច្បាស់លាស់។ អគ្គនាយកកសិកម្មត្រូវសហការជាមួយមន្ទីរកសិកម្មរាជធានីខេត្ត ត្រូវរៀបកម្មវិធីទស្សនកិច្ចសិក្សាផ្លាស់ប្តូរ និង ចែករំលែកពិសោធន៍រវាង កសិករនិងកសិករ មន្ត្រីនិងមន្ត្រី ដើម្បីរកការរីកចម្រើន និងដោះស្រាយបញ្ហា។ អគ្គនាយកដ្ឋានកសិកម្មនាយក ដ្ឋានដំណាំស្រូវ និងមន្ទីរត្រូវសិក្សាស្រាវជ្រាវ និងផ្សព្វផ្សាយពីការជួយទំនុកបម្រុង និងថែរក្សា គុណភាពដីដល់ប្រជាកសិករ (គុណភាពដីល្អធ្វើឪ្យទិន្នផលខ្ពស់ ទិន្នផលខ្ពស់ទើបជីវភាព សម្បូរធូរធារ)។
ឯកឧត្តមរដ្ឋមន្ត្រីរំលឹកកសិករទៀតថា បច្ចុប្បន្នយើងត្រូវឈប់ផលិតដើម្បីហូបចុក។ ផលិតគ្មានគោលដៅច្បាស់លាស់ ផលិតរបៀបរាយប៉ាយ។ តែត្រូវចងក្រងជាក្រុមជាសហ គមន៍ផលិត ដើម្បីឆ្លើយតបទៅតាមសេចក្តីត្រូវការទីផ្សារ មានទីផ្សារ និងតម្លៃត្រូវបានធានា។ អគ្គនាយកដ្ឋានកសិកម្មរាជធានី-ខេត្ត ត្រូវរៀបកម្មវិធីបណ្តុះបនណ្តាលដល់ថ្នាក់មូលដ្ឋានឱ្យបានទូលំទូលាយ និងស៊ីជម្រៅទាំងទ្រឹស្តីនិងការអនុវត្តន៍។
មានប្រសាសន៍ក្នុងឱកាសនោះដែរ ឯកឧត្តមឧបនាយករដ្ឋមន្ត្រីយឹម ឆៃលី បានជម្រាបជូនប្រជាពលរដ្ឋ ពីសភាពការណ៍នយោបាយសេដ្ឋកិច្ច និងសង្គម ហើយបានអំពាវនាវឱ្យប្រជាពលរដ្ឋខិតខំយកចិត្តទុកដាក់លើការងារបង្កបង្កើនផល ដើម្បីបង្កើនជីវភាពក្នុងគ្រួសារ ឈានទៅសម្រេចគោលនយោបាយ របស់រាជរដ្ឋាភិបាលនាឆ្នាំ២០១៥ កម្ពុជាត្រូវផលិតស្រូវឱ្យបាន ៤លានដើម្បីនាំចេញអង្ករឱ្យបាន១លានតោនក្នុងមួយឆ្នាំ និងត្រូវធ្វើយា់ងណាឱ្យអន្តរជាតិ ទទួលស្គាល់គុណភាពអង្ករកម្ពុជា ។ ឈានទៅសម្រេចគោលដៅនេះបានលុះត្រាតែបងប្អូន ប្រជាពលរដ្ឋ យើងទាំងអស់គ្នាខិតខំយកចិត្តទុកដាក់អនុវត្តឪ្យបាននូវបច្ចេកទេស ដែលក្រសួងកសិកម្មបានផ្សព្វផ្សាយទាំងពូជស្រូវទាំង១០ប្រភេទនិងបច្ចេកទេសបវស ៕
