ឯកឧត្តមរដ្ឋមន្រ្តី និងសហការី បានបន្តចូលទៅពិនិត្យការអនុវត្តជាក់ស្តែង និងវឌ្ឍនភាពនៃការពិសោធន៍ស្រែបង្ហាញក្នុងកសិដ្ឋានផលិតពូជស្រូវហាយប្រីដរបស់ក្រុមហ៊ុន ហាយប្រីដ រ៉ាយស៍ លៀនហ្វា

ចេញ​ផ្សាយ​ ២៥ កញ្ញា ២០១៨ 3015

កម្មវិធីទី៣៖ ខេត្តពោធិសាត់ ឯកឧត្តមរដ្ឋមន្រ្តី និងសហការី បានបន្តចូលទៅពិនិត្យការអនុវត្តជាក់ស្តែង និងវឌ្ឍនភាពនៃការពិសោធន៍ស្រែបង្ហាញក្នុងកសិដ្ឋានផលិតពូជស្រូវហាយប្រីដរបស់ក្រុមហ៊ុន ហាយប្រីដ រ៉ាយស៍ លៀនហ្វា នៅភូមិស្នាមព្រះ ឃុំស្នាមព្រះ ស្រុកបាកាន ក្នុងទឹកដីខេត្តពោធិសាត់។ បច្ចុប្បន្ន ក្រុមហ៊ុនបានវិនិយោគ លើផ្ទៃដីជាង ២០០ហត សម្រាប់ធ្វើការផ្សាំពូជស្រូវហាយប្រីដនិងពូជស្រូវកន្តុល ការធ្វើស្រែបង្ហាញ ស្រាវជ្រាវ និងដាំកប្បាស់ផងដែរ ក្រៅពីនេះក្រុមហ៊ុនបានសាងសង់អាគាររដ្ឋបាល អាគារស្នាក់នៅ ឃ្លាំងស្តុកស្រូវពូជ រួមទាំងរោង ចក្រកាត់ដេរសំលៀកបំពាក់មួយទៀតផង។ក្រុមហ៊ិមកំពុងស្រាវជ្រាវពូជស្រូវស៊ុបផើហាយប្រីដរ៉ាយស៍ដែលផ្តល់ទិន្នផលខ្ពស់ មានដើមរឹង ធន់ជំងឺ និងការបម្រែបម្រួលអាកាសធាតុ។

នាក្នុងឱកាសនេះ ឯកឧត្តមរដ្ឋមន្ត្រីបានធ្វើការកោតសរសើរ និងវាយតម្លៃខ្ពស់ចំពោះសមិទ្ធផលសំខាន់ៗជាច្រើនដែលក្រុមហ៊ុនសម្រេចបានកន្លងមកដែលសមិទ្ធផលទាំងអស់នេះបានបង្ហាញយ៉ាងច្បាស់ពីការចូលរួមពីវិស័យឯកជនក្នុងការវិនិយោគដើម្បីអភិវឌ្ឍវិស័យឧស្សាហកម្មកាត់ដេរ រួមទាំងវិស័យកសិកម្មផងដែរដើម្បីរួមចំណែកបង្កើតការងារជូនពលរដ្ឋនៅមូលដ្ឋាន បង្កើនចំណូលក្នុងគ្រួសារ និងទ្រទ្រង់កំណើនសេដ្ឋកិច្ចជាតិ។ ជាថ្មីម្តងទៀតឯកឧត្តមបានសន្យាថានឹងបន្តផ្តល់កិច្ចសហការ និងគាំទ្រលើសកម្មភាពវិនិយោគរបស់ក្រុមហ៊ុនដើម្បីផលិត ពូជស្រូវសុទ្ធល្អ មានទិន្នផលខ្ពស់ និងមានតម្រូវការទីផ្សារ ប្រយោជន៍បង្កើនផលិតកម្មដំណាំស្រូវ ឈានទៅធ្វើការ នាំចេញស្របតាមគោលនយោបាយរបស់រាជរដ្ឋាភិបាល។

សូមបញ្ជាក់ផងដែរថា តបតាមការអញ្ជើញឯកឧត្តមរដ្ឋមន្រ្តី និងប្រតិភូក្រសួង នឹងទៅធ្វើទស្សនកិច្ចក្រុមហ៊ុមនៅ ប្រទេសចិនក្នុងពេលឆាប់ៗនេះដើម្បីពិនិត្យនិងស្វែងយល់លើការងារស្រាវជ្រាវ កែច្នៃ ឡសម្ងួត និងការធ្វើកសិកម្មតាមកិច្ចសន្យារបស់ក្រុមហ៊ុន។ បន្ទាប់ពីដំណើរទស្សនកិច្ច ក្រសួងនិងក្រុមហ៊ុននឹងរៀបចំចុះអនុស្សរណៈនៃការ យោគយល់គ្នាដើម្បីអភិវឌ្ឍផលិតកម្មពូជស្រូវហាយប្រីដ នេះ។