លោកប្រធាននាយកដ្ឋានអញ្ជើញអមដំណើរឯកឧត្តមរដ្ឋមន្រ្តីចុះពិនិត្យសភាពការណ៍បង្កបង្កើនផលកសិកម្មដំឡូងបារាំងនៅខេត្តមណ្ឌលគិរី

ចេញ​ផ្សាយ​ ១១ កុម្ភៈ ២០១៩ 11051

មណ្ឌលគិរី៖ នាព្រឹកថ្ងៃសៅរ៍ ៥កើត ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៩ ខែកុម្ភៈ ឆ្នាំ ២០១៩ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោកជំទាវ អមដំណើរដោយឯកឧត្តមជាថ្នាក់ដឹកនាំក្រសួង ព្រមទាំងមន្រ្តីរាជការក្រោមឱវាទក្រសួង ឯកឧត្តម ស្វាយ សំអ៊ាង អភិបាលនៃគណៈអភិបាលខេត្តមណ្ឌលគិរី និងលោកប្រធានមន្ទីរកសិកម្មខេត្តមណ្ឌលគិរី បានអញ្ជើញចុះពិនិត្យសភាពការណ៍បង្កបង្កើនផលកសិកម្ម និងការប្រមូលផលដំណាំដំឡូងបារាំង របស់កសិករ គ្រី ម៉េងឃាង ស្ថិតនៅភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។

ក្នុងឱកាសនេះដែរ សាកលវិទ្យាល័យភូមិន្ទកសិកម្មភ្នំពេញបានសហការជាមួយអង្គការ KOPIA និងមន្ទីរកសិកម្ម រុក្ខាប្រមាញ់ និងនេសាទ ចុះអនុវត្តគម្រោងស្តីពីការផ្សព្វផ្សាយ និងផលិតកម្មដំឡូងបារាំងនៅកម្ពុជា។ គម្រោងបាននាំយកពូជពីប្រទេសវៀតណាម កូរ៉េ អាឡឺម៉ង់ និងកាណាដា។ល។ ដោយជ្រើសរើសយកលោកគ្រី ម៉េងឈាង ធ្វើជាដៃគូដាំសាកល្បងតាំងពីឆ្នាំ២០១៦។ លទ្ធផលនៃការពិសោធន៍ស្រាវជ្រាវបានបង្ហាញថានៅឆ្នាំដំបូងដំឡូងជួបបញ្ហាជំងីផ្សិត រលួយគល់ និងសត្វល្អិត នៅឆ្នាំបន្ទាប់ការ ពិសោធន៍លើកទី១ ត្រូវបរាជ័យដោយសារទឹកភ្លៀង តែលើកទី២ ទទួលបានលទ្ធផលល្អប្រសើរ ហើយទិន្នផលពូជខ្លះអាចទទួលបានរហូត ២៥តោន/ហត ខ្ពស់បំផុត និងទាបបំផុត ២,៣តោន/ហត។ ដោយឡែកនៅឆ្នាំ ២០១៨ កន្លងមកនេះការពិសោធន៍ត្រូវបានចែកជា៣ដំណាក់កាល លើកទី១ ទិន្នផលទទួលបាន ១៧តោន/ហត ហើយលើកទី២ និងទី៣ នឹងប្រមូលផលនៅក្នុងខែមីនាខាងមុខ។ លោកគ្រី ម៉េងឈាង បានជម្រាបជូនឯកឧត្ដមរដ្ឋមន្ត្រីជ្រាបថាដំឡូងបារាំងគឺជាដំណាំថ្មី ដែលកសិករមិនទាន់ចាប់អារម្មណ៍ធ្វើការដាំដុះទេ ម៉្យាងទៀតការដាំដុះដំណាំនេះទាមទារបច្ចេកទេសខ្ពស់ ជាពិសេសនោះវាកំពុងស្ថិតក្នុងដំណាក់កាលនៃការពិសោធន៍ស្រាវជ្រាវនៅឡើយ។ លោកសង្ឃឹមថាបើការពិសោធន៍បានទទួលជោគជ័យ កសិករនឹងចាប់អារម្មណ៍ដាំច្រើននាពេលអនាគត ពីព្រោះដាំណាំនេះមានទីផ្សារល្អ និងតម្លៃខ្ពស់ទៀតផង បច្ចុប្បន្នលក់បាន ៥-៦០០០រៀល/kg ហើយដោយសារចំណូលនេះហើយធ្វើឱ្យជីវភាព របស់គ្រួសារគាត់ធូរធារ ព្រោះក្នុង១វគ្គប្រមូលផលគាត់អាចទទួលចំណូលបាន ១៧០០០ដុល្លារ(គិតទាំងថ្លៃដើម)។

ប្រសាសន៍ដ៏មានអត្ថន័យរបស់ឯកឧត្តមរដ្ឋមន្ត្រីថា  ៉កម្ពុជាដាំបានហើយ  ៉ និយាយដោយទឹកចិត្តសប្បាយរីករាយពេលឃើញដំឡូងបារាំងផ្តល់ផលបានល្អយ៉ាងដូច្នេះ។ នាឱកាសនេះ ឯកឧត្តមរដ្ឋមន្ត្រីបានធ្វើការវាយតម្លៃខ្ពស់ចំពោះសាកលវិទ្យាល័យភូមិន្ទកសិកម្ម អ្នកស្រាវជ្រាវ និងអង្គការ KOPIA ជាពិសេសម្ចាស់ចំការដែលបានសហការធ្វើការសិក្សាស្រាវជ្រាវ រហូតទទួលបានលទ្ធផលជាផ្លែផ្កាដូចយើងបានឃើញនាពេលនេះ។ លោកសូមឱ្យក្រុមការងារបន្តស្រាវជ្រាវបន្ថែមទៀត ប្រយោជន៍ស្វែងរកលទ្ធផលល្អមួយតាមការរំពឹងទុក ដើម្បីធ្វើការផ្សព្វផ្សាយឱ្យកសិករដាំដំណាំនេះ បានទូលំទូលាយទូទាំងខេត្តមណ្ឌលគីរី ធានាបរិមាណផ្គត់ផ្គង់តម្រូវការទីផ្សារ កាត់បន្ថយការនាំចូល និងចូលរួមលើកកម្ពស់កម្រិតជីវភាពរបស់បងប្អូនជាជនជាតិភាគតិចនាពេលអនាគត។ គួរស្វែងរកដៃគូវិនិយោគ ដើម្បីិធានាដល់និរន្តរភាពផលិត ផ្គត់ផ្គង់ គុណភាព និងអនាម័យ ដោយត្រូវអនុវត្តតាមផលិតកម្មកសិកម្មតាមកិច្ចសន្យា។ ឯកឧត្តមក៏បានស្នើឱ្យសហគមន៍កសិកម្ម និងសហគមន៍ព្រៃឈើងាកមកចាប់អារម្មណ៍ដាំដំឡូងបារាំងដើម្បីកែលម្អកម្រិតជីវភាព បង្កើតអាជីពថ្មី កាត់បន្ថយការពឹងអាស្រ័យតែលើផល និងអនុផលព្រៃឈើ។ ឯកឧត្តមបានស្នើឱ្យគម្រោងសហការជាមួយម្ចាស់ចំការពិនិត្យលទ្ធភាពរៀបចំជាតំបន់ទេសចរណ៍ ផ្តល់ឱកាសឱ្យភ្ញៀវដកដំឡូង និងទិញផលដំឡូង ដើម្បីបង្កើតការងារបន្ថែម និងបង្កើនចំណូលឱ្យមាននិរន្តរភាព។