ឯកឧត្តម រដ្ឋលេខាធិការ គង់ ច័ន្ទវាសនា បានអញ្ជើញចូលរួមកិច្ចប្រជុំពិភាក្សា និងផ្ទៀងផ្ទាត់លើការធ្វើបច្ចុប្បន្នភាព និងការចងក្រងទិន្នន័យដីធ្លីជុំវិញតំបន់បឹងទន្លេសាប

ចេញ​ផ្សាយ​ ២១ តុលា ២០២៥ 682

នាថ្ងៃច័ន្ទ ទី២០ ខែតុលា ឆ្នាំ២០២៥ ឯកឧត្តម រដ្ឋលេខាធិការ គង់ ច័ន្ទវាសនា អមដំណើរដោយលោកជំទាវ ហ៊ូ សុពណ៌ អនុរដ្ឋលេខាធិការ និងលោក សុង ហុង អនុប្រធានរដ្ឋបាលជលផល បានអញ្ជើញចូលរួមកិច្ចប្រជុំពិភាក្សា និងផ្ទៀងផ្ទាត់លើការធ្វើបច្ចុប្បន្នភាព និងការចងក្រងទិន្នន័យដីធ្លីជុំវិញតំបន់បឹងទន្លេសាប ក្នុងភូមិសាស្ត្រខេត្តបាត់ដំបង និងខេត្តពោធិ៍សាត់ ក្រោមការដឹកនាំរបស់ ឯកឧត្តម តឹក រ៉េតសំរ៉េច រដ្ឋលេខាធិការប្រចាំការក្រសួងដែនដី នគរូបនីយកម្ម និងសំណង់ និងមានការចូលរួមពីប្រធាន អនុប្រធាន សមាជិកក្រុមការងារប្រតិបត្តិ អាជ្ញាធរទន្លេសាប រដ្ឋបាលខេត្ត រដ្ឋបាលស្រុក មេឃុំ និងមន្ត្រីពាក់ព័ន្ធជាច្រើន។
កិច្ចប្រជុំនេះមានគោលបំណងសំខាន់ក្នុងការរៀបចំលក្ខខណ្ឌការប្រើប្រាស់ដីឃុំ-សង្កាត់ និងពន្លឿនការកំណត់ពីសក្តានុពលនៃការប្រើប្រាស់ដី ដើម្បីធានាឱ្យការប្រើប្រាស់ធនធានដីស្របតាមផែនការអភិវឌ្ឍន៍ និងសក្ដានុពលធនធានដីក្នុងតំបន់ ដោយជៀសវាងការប៉ះពាល់ដល់តំបន់ការពារ និងតំបន់រក្សាទុកធម្មជាតិ។
នាឱកាសនោះដែរ ឯកឧត្តម គង់ ច័ន្ទវាសនា បានសង្កត់ធ្ងន់ថា ក្រសួងកសិកម្ម រុក្ខាប្រមាញ់ និងនេសាទលើកទឹកចិត្តឱ្យកសិករចូលរួមជាមួយសហគមន៍កសិកម្មទំនើបដែលអាចជួយកាត់បន្ថយថ្លៃដើមផលិកម្ម ការផ្សារភ្ជាប់ទៅកាន់ទីផ្សារ និងធានាបាននូវតម្លៃសមរម្យ ធ្វើយ៉ាងណាឱ្យកសិករទទួលបានប្រាក់ចំណេញពីការប្រកបរបកសិកម្ម។ 
ទន្ទឹមនឹងនេះ ឯកឧត្តមប្រធានអង្គប្រជុំបានណែនាំឱ្យអាជ្ញាធរមូលដ្ឋាន ជួយផ្សព្វផ្សាយឱ្យប្រជាពលរដ្ឋយល់ដឹងអំពីសារៈសំខាន់នៃការការពារបឹងទន្លេសាប និងជីវចម្រុះជុំវិញបឹងទន្លេសាប ដើម្បីជួយរក្សាទុកធនធានធម្មជាតិ និងលើកកម្ពស់ជីវភាពរស់នៅប្រជាជន។