Other News
លោកជំទាវអនុរដ្ឋលេខាធិការ យ៉ើ អាស៊ីគីន អញ្ជើញដឹកនាំកិច្ចប្រជុំពិនិត្យលើអនុស្សរណៈ នៃការយោគយល់គ្នាជាមួយ អាជ្ញាធរមីន ស្តីពី «កិច្ចសហប្រតិបត្តិការក្នុងការជំរុញ និងអភិវឌ្ឍវិស័យកសិកម្មលើដីបានបោសសម្អាតមីនរួច ដើម្បីលើកកម្ពស់ជីវភាពរស់នៅរបស់សហគមន៍មូលដ្ឋាន»
ចេញផ្សាយ ២៦ កុម្ភៈ ២០២៦ 1063
នាព្រឹកថ្ងៃទី២៦ ខែកុម្ភៈ ឆ្នាំ២០២៦ លោកជំទាវ យ៉ើ អាស៊ីគីន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំពិនិត្យ និងកែសម្រួលខ្លឹមសារអនុស្សរណៈនៃការយោគយល់គ្នា (MoU) ជាមួយអាជ្ញាធរមីន ស្តីពី «កិច្ចសហប្រតិបត្តិការក្នុងការជំរុញ និងអភិវឌ្ឍវិស័យកសិកម្មលើដីបានបោសសម្អាតមីនរួច ដើម្បីលើកកម្ពស់ជីវភាពរស់នៅរបស់សហគមន៍មូលដ្ឋាន» ។
កិច្ចប្រជុំដែលធ្វើឡើង នៅទីស្តីការក្រសួងកសិកម្ម មានគោលបំណងសំខាន់ៗរួមមាន៖ គាំទ្រសកម្មភាពបោសសម្អាតមីន និងផ្សព្វផ្សាយពីគ្រោះថ្នាក់នៃយុទ្ធភណ្ឌមិនទាន់ផ្ទុះ។ ជំរុញការអភិវឌ្ឍកសិកម្មបែបទំនើបលើដីសុវត្ថិភាព ដើម្បីបង្កើនផលិតភាព និងប្រាក់ចំណូលជូនប្រជាពលរដ្ឋ។ លើកកម្ពស់ជីវភាព និងកាត់បន្ថយភាពក្រីក្រ តាមរយៈការផ្ទេរបច្ចេកទេស ផ្តល់ធាតុចូលកសិកម្ម និងការតភ្ជាប់ទីផ្សារ។ កៀរគរធនធានពីដៃគូអភិវឌ្ឍន៍ និងវិស័យឯកជន ដើម្បីគាំទ្រដល់គម្រោងសមាហរណកម្មដីស្អាតមីន និងកសិកម្ម។
ជាកិច្ចបញ្ចប់ លោកជំទាវយ៉ើ អាស៊ីគីន បានថ្លែងអំណរគុណ និងលើកទឹកចិត្តដល់គ្រប់ភាគីពាក់ព័ន្ធ ឱ្យបន្តកិច្ចសហប្រតិបត្តិការឱ្យកាន់តែជិតស្និទ្ធ ដើម្បីសម្រេចបាននូវលទ្ធផលជាផ្លែផ្កា ជូនប្រជាកសិករនៅតាមមូលដ្ឋាន ប្រកបដោយប្រសិទ្ធភាព និងប្រសិទ្ធផល៕
