Other News
ឯកឧត្តមរដ្ឋមន្ត្រី ឌិត ទីណា ទទួលជួបសម្តែងការគួរសម និងពិភាក្សាការងារជាមួយក្រុមការងារអច្ឆរិយភាពនៃទន្លេមេគង្គ (Wonders of the Mekong)
ចេញផ្សាយ ៨ សីហា ២០២៤ 3646
នៅរសៀលថ្ងៃទី០៦ ខែសីហា ឆ្នាំ២០២៤ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបសម្តែងការគួរសម និងពិភាក្សាការងារជាមួយក្រុមការងារអច្ឆរិយភាពនៃទន្លេមេគង្គ (Wonders of the Mekong) នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
នៅក្នុងជំនួបនេះ ឯកឧត្តមរដ្ឋមន្ត្រី បានសម្តែងនូវការស្វាគមន៍ ដល់ក្រុមការងារអច្ឆរិយភាពនៃទន្លេមេគង្គ ក្នុងការពិនិត្យលទ្ធភាពសហការធ្វេីការជាមួយគ្នា ដើម្បីឱ្យមានភាពប្រសើរឡើងនូវធនធានធម្មជាតិនៃទន្លេមេគង្គ ដែលមានសារៈប្រយោជន៍សម្រាប់មនុស្សជាតិ។
ជាមួយគ្នានេះដែរ ឯកឧត្តមរដ្ឋមន្ត្រី បានណែនាំឱ្យក្រុមការងារ ត្រូវគិតគូរពីយុទ្ធសាស្រ្តគ្រប់គ្រងធនធានធម្មជាតិឱ្យមានតុល្យភាព ដោយកំណត់អំពីបរិមាណតម្រូវការចំណីអាហាររបស់ប្រជាពលរដ្ឋ ប្រកបដោយប្រសិទ្ធភាព និងមាននិរន្តរភាព។
លើសពីនេះទៅទៀត ឯកឧត្តមរដ្ឋមន្ត្រី បានគូសបញ្ជាក់ប្រាប់ក្រុមការងារ ត្រូវមានគោលដៅពិនិត្យមើលអំពីលទ្ធភាពបង្កកំណើត និងបង្កាត់ប្រភេទ ត្រីបបែលយក្ស សត្វផ្សោត ត្រីគល់រាំង និងសត្វកម្រផ្សេងៗទៀត ដើម្បីបង្កើនចំនួននៃសត្វទាំងនេះ នៅក្នុងធម្មជាតិ។
ជាយន្តការបន្ទាប់ ឯកឧត្តមរដ្ឋមន្ត្រី បានជំរុញឱ្យក្រុមការងារអច្ឆរិយភាពនៃទន្លេមេគង្គ ចូលរួមសហការជាមួយរដ្ឋបាលជលផល សាកលវិទ្យាល័យភូមិន្ទកសិកម្ម ហើយក្រសួងនឹងជួយគាំទ្រទាំងលក្ខណៈផ្លូវច្បាប់ និងបច្ចេកទេស៕
