ឯកឧត្តមរដ្ឋលេខាធិការ ហ៊ាន វណ្ណហន ដឹកនាំក្រុមការងារអនុវត្ដគម្រោងថ្នាក់ជាតិ CASDP/MAFF អញ្ជើញចុះត្រួតពិនិត្យវឌ្ឍនភាព និងតម្រង់ទិសការអនុវត្ដន៍គម្រោង នៅខេត្ដបាត់ដំបង

ចេញ​ផ្សាយ​ ១៧ កញ្ញា ២០២៥ 568

នៅថ្ងៃទី១៧ ខែកញ្ញា ឆ្នាំ២០២៤ ឯកឧត្ដម ហ៊ាន វណ្ណហន រដ្ឋលេខាធិការ និងជាប្រធានគណកម្មការដឹកនាំគម្រោងពិពិធកម្មកសិកម្មកម្ពុជា CASDP បានដឹកនាំក្រុមការងារអនុវត្ដគម្រោងថ្នាក់ជាតិ CASDP_MAFF អញ្ជើញចុះត្រួតពិនិត្យវឌ្ឍនភាព និងតម្រង់ទិសការអនុវត្ដន៍គម្រោងនៅខេត្ដបាត់ដំបង។ 
ក្នុងដំណើរបេសកកម្ម ឯកឧត្តមរដ្ឋលេខាបានផ្តល់ការណែនាំដល់មន្ទីរកសិកម្ម អំពីព័ត៌មានសំខាន់ៗពាក់ព័ន្ធគម្រោង និងទិសដៅអនុវត្តបន្ដ ក្នុងការជំរុញគាំទ្រសហគមន៍កសិកម្មដែលបានចុះកិច្ចព្រមព្រៀងទទួលហិរញ្ញប្បទានឥតសំណងបំពេញបន្ថែមទុនវិនិយោគ និងទទួលបានហេដ្ឋារចនាសម្ព័ន្ធគាំទ្រពីគម្រោង។
បន្ថែមពីនេះទៀត ឯកឧត្ដម បានដឹកនាំក្រុមការងារ លោកប្រធានមន្ទីរ និងមន្រ្ដីអនុវត្តគម្រោងមន្ទីរកសិកម្មខេត្ដបាត់ដំបង ចុះជួបពិភាក្សាជាមួយប្រធាន អនុប្រធាន និងសមាជិកសហគមន៍កសិកម្មពន្លឺថ្មីពេជ្រចិន្ដា ស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្ដបាត់ដំបង ដើម្បីជាមូលដ្ឋានបន្ថែមក្នុងការពង្រឹងសមត្ថភាពរបស់សហគមន៍។ សហគមន៍កសិកម្មនេះ បានចុះកិច្ចព្រមព្រៀងទទួលហិរញ្ញប្បទានឥតសំណងបំពេញបន្ថែមទុនវិនិយោគពីគម្រោងពិពិធកម្មកសិកម្មកម្ពុជា (CASDP) កាលពីខែតុលា ឆ្នាំ២០២២  ក្នុងបរិមាណទុនវិនិយោគ សរុបប្រមាណ ៧០ម៉ឺនដុល្លា ក្នុងនោះ ២៤ម៉ឺនដុល្លា (៤០%) បានទទួលពីគម្រោង។
ឆ្លៀតក្នុងឱកាសនេះ ឯកឧត្ដម ក៏បានវាយតម្លៃខ្ពស់ ពីភាពរីកចម្រើនរបស់សហគមន៍ លើសមត្ថភាពដឹកនាំ និងផលិតកម្មបន្លែក្នុងរោងបន្លែសុវត្ថិភាព ផ្ទះសំណាញ់សរុប ចំនួន ៥១២ ខ្នង (ប្រមាណជា ១៣ ហិចតា) ដែលអាចផលិតបានចន្លោះ ពី ២ ទៅ ២,៥ តោន ក្នុង ១ ថ្ងៃ។  បន្ថែមពីនេះទៀត ឯកឧត្ដម បានលើកទឹកចិត្តឱ្យគម្រោង បន្ដគាំទ្រសហគមន៍ ក្នុងនោះ រួមមាន វិធានការកម្ចាត់សត្វល្អិតលើដំណាំក្នុងផ្ទះសំណាញ់ និងការលើកកម្ពស់ជីជាតិដី ជាដើម។ ឯកឧត្ដម បានលើកទឹកចិត្ដដល់សហគមន៍ ក្នុងការកៀងគរប្រជាពលរដ្ឋដែលវិលត្រលប់ពីប្រទេសថៃ ចូលរួមក្នុងផលិតកម្មបន្លែ ការប្រមូលផលពោត និងការកែច្នៃផ្លែមៀន ផងដែរ៕