ពិធីចុះហត្ថលេខាកិច្ចសន្យាផលិតកម្មកសិកម្ម ស្តីពីការផលិត និងផ្គត់ផ្គង់ស្រូវ ដំឡូងមីសរីរាង្គសហគមន៍កសិកម្មក្នុងខេត្តព្រះវិហារ និងក្រុមហ៊ុនអេមរុរ៉ាយស៍ (ខេមបូឌា)

ចេញ​ផ្សាយ​ ២៣ មិថុនា ២០២៣ 7056

ថ្ងៃសុក្រ ៦កើត ខែបឋមសាឍ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២៣ ខែមិថុនា ឆ្នាំ២០២៣ លោកបណ្ឌិត ចាយ ជីម ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានចូលរួមជាគណៈអធិបតី និងជាសក្ខីភាពក្នុងពិធីចុះហត្ថលេខាកិច្ចសន្យាផលិតកម្មកសិកម្ម ស្តីពីការផលិត និងផ្គត់ផ្គង់ស្រូវ ដំឡូងមីសរីរាង្គសហគមន៍កសិកម្មក្នុងខេត្តព្រះវិហារ និងក្រុមហ៊ុនអេមរុរ៉ាយស៍ (ខេមបូឌា)​ សម្រាប់ឆ្នាំ២០២៣ ក្រោមអធិបតីភាព ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ នៅសាលប្រជុំសាលាខេត្តព្រះវិហារ។ ពិធីចុះកិច្ចសន្យានេះមានគោលបំណងធំៗចំនួន ៣រួមមាន៖ (១)ជំរុញក្នុងការភ្ជាប់ដៃគូអាជីវកម្មតាមរយៈកិច្ចសន្យាទិញលក់ស្រូវសរីរាង្គរបស់សហគមន៍ ក្រុមផលិត និងឈ្មួញទិញក្នុងតំបន់ រោងម៉ាស៊ីនកិនស្រូវ និងក្រុមហ៊ុនដែលមានសក្តានុពលនៅលើទីផ្សារក្នុងស្រុក និងក្រៅប្រទេស (២)ផ្សារភ្ជាប់ដៃគូអាជីវកម្ម ដូចជា ធាតុចូលកសិកម្ម គ្រឿងយន្តកសិកម្ម ស្ថាប័នឥណទាន និង(៣)ពង្រឹងទំនាក់ទំនងអាជីវកម្មរវាងតួអង្គខ្សែច្រវាក់តម្លៃ និងពង្រឹងភាពជាដៃគូរវាងវិស័យសាធារណៈ វិស័យឯកជន និងក្រុមផលិត។

សម្រាប់ការចុះកិច្ចសន្យាផលិតកម្មកសិកម្មនេះ ក្រុមហ៊ុន អេមរុរ៉ាយស៍ បានចុះកិច្ចសន្យាទិញស្រូវសរីរាង្គក្នុងបរិមាណ ១៦ ០០០តោន ជាមួយសហគមន៍កសិកម្មចំនួន ២១សហគមន៍ ដែលមានអ្នផលិតសរុបប្រមាណជាង ៣ ០០០គ្រួសារ និងក្រុមហ៊ុនសាជីវកម្មសហគមន៍កសិកម្មកម្ពុជា។ ក្នុងនោះដែរក្រុមហ៊ុនក៏បានចុះកិច្ចសន្យាទិញដំឡូងមីសរីរាង្គប្រមាណ ២៥ ០០០តោន ដែលទទួលផ្គត់ផ្គង់ពីសហគមន៍កសិកម្មចំនួន ១០ ដែលមានអ្នកផលិតសរុបជាង ១ ៤០០គ្រួសារ។ មិនតែប៉ុណ្ណោះក្រុមហ៊ុនអេមរុរ៉ាយស៍ បានផ្តល់ជាឥណទានពូជស្រូវផ្ការំដួលចុះបញ្ជីប្រមាណជា ៥៩ ៤០០គីឡូក្រាម សម្រាប់ការដាំដុះក្នុងឆ្នាំ២០២៣នេះ ដើម្បីរួមចំណែកក្នុងការបង្កើនទិន្នផល និងគុណភាពអង្ករសម្រាប់ការនាំចេញទៅកាន់ទីផ្សារអន្តរជាតិ។