ព័ត៌មានផ្សេងៗទៀត
មន្រ្តីអំពាវនាវឪ្យប្រជាជនចូលរួមជំរុញវារីវប្បកម្មនិងការពារធនធានសមុទ្រ
ចេញផ្សាយ ១៥ មករា ២០១៨ 5036
លោករដ្ឋមន្រី្តក្រសួងកសិកម្មបានអំពាវនាវដល់ប្រជានេសាទ និងប្រជាជនដែលអាស្រ័យដោយទឹកសមុទ្រ នោះឱ្យចូលរួមអភិរក្សធនធានសមុទ្រជាមួយ នឹងការចិញ្ចឹមបនែ្ថមនូវធនធានទាំងនោះដើម្បីបង្កើន ចំណូលក្នុងគ្រួសារ។
លោកច័ន្ទ សារុនរដ្ឋមន្រី្តក្រសួងរុក្ខាប្រមាញ់ និងនេសាទបានអញ្ជើញចូលរួមក្នុងពិធីលែងគ្រែងឈាម ក្ដាមថ្ម និងដាំដើមកូនកោងកាងជានិមិត្តរូប និងសំណេះសំណាលជាមួយសមាជិកសហគមន៍នេសាទតំបន់ធ្នេរសមុទ្រកោះខ្យងចំនួន៨០គ្រួសារនៅភូមិអន់ឆ្អើត ឃុំជីខក្រោម ស្រុកស្រែអំបិល។
នៅទីនោះលោកបានថ្លែងទៅកាន់ទីកន្លែងដទៃថា សហគមន៍ដែលបង្កើតបាននិងកំពុងដំណើរនេះត្រូវបន្តពង្រឹងអោយបានល្អ។ ត្រូវថែរក្សាការពារកន្លែងអភិរក្សឱ្យបានដាច់ខាត និងកុំប្រើឧបករណ៍ខុសច្បាប់ និងបំផុសទៅកាន់ប្រជានេសាទដទៃ ដែលមិនមែនជាសមាជិកសហគមន៍។លោករដ្ឋមន្ត្រីក៏បានជំរុញផងដែរថា មិនត្រូវពឹងផ្អែកតែលើធនធានធម្មជាតិតែមួយមុខទៅទៀតឡើយតែត្រូវពង្រីកនូវការចិញ្ចឹមត្រី ក្ដាម បង្គា ព្រោះកិច្ចការនេះអាចធ្វើបាន។ លោករំលឹកថា ប្រជាសហគមន៍ទាំងអស់ឈប់ចាប់ក្តាមតូចៗ កូនគ្រែងឈាម យកទៅលក់ព្រោះជាការខាតបង់ដ៏ធំមួយនៅពេលអនាគត។
លោកក៏បានអំពាវនាវអោយប្រជាជនចូលរួមដាំព្រៃកោងកាង។លោកបញ្ជាក់ថា មានព្រៃកោងកាងគឺមានមុខរបរ។ ខណ្ឌរដ្ឋបាលជលផលត្រូវទទួលខុសត្រូវ ដើម្បីបង្កើតថ្នាលបណ្តុះកូនដើមកោងកាង និងកូនឈើព្រៃលិចទឹកចម្រុះ។ លោកបានជូនយោបល់ផងដែរពីការបង្កើតធនាគារក្ដាមឱ្យបានច្រើន និងលែងកូនក្ដាមដែលមានពងកូន នៅពេលនេសាទបានដើម្បីទុកអោយវាបន្តពូជពង្សតទៅទៀត។
សហគមន៍នេសាទតំបន់ឆ្នេរសមុទ្រកោះខ្យងបានបង្កើតឡើងនៅឆ្នាំ២០០៣លើផ្ទៃដី ១២.៣៣៦ ហិកតាដែលមានប្រជានេសាទចំនួន២៥២គ្រួសារមកពីភូមិចំនួន៣ គឺភូមិខ្សាច់ក្រហម តាបែន និងអន់ឆ្អើត។ ឆ្លើយតបទៅនឹងសំណូមពរប្រជាសហគមន៍លោករដ្ឋមន្ត្រីបានផ្តល់ទូកអូប័រមួយគ្រឿងកម្លាំង៤០សេសសម្រាប់ទុកអោយសហគមន៍ប្រើប្រាស់ក្នុងការបង្ក្រាបបទល្មើសនេសាទ។ លោករដ្ឋមន្ត្រីបានសំណូមពរដល់សហគមន៍អោយប្រើប្រាស់ទូកអូប័រដែលទទួលបាននេះអោយបានល្អប្រយោជន៍ ដើម្បីប្រើប្រាស់បានយូរអង្វែង។ សូមបញ្ជាក់ថា លោករដ្ឋមន្រី្តបានអញ្ជើញទៅទីនោះកាលពីពាក់កណ្តាលសប្តាហ៍នេះ។
